କୃଷି କ୍ଷେତ୍ରରୁ ଅଧିକ ଆୟ ପାଇବା ନିମନ୍ତେ ଉପଯୁକ୍ତ ଯୋଜନା ଆବଶ୍ୟକତା ରହିଛି ।
ନିକଟରେ ରହିଥିବା ସମ୍ବଳ, ବଜାର ସୁବିଧା, ଜଳବାୟୁ, ଜମିର ପ୍ରକାର ଏବଂ ନିଜ ସାମର୍ଥକୁ ଦୃଷ୍ଟିରେ ରଖି ଯୋଜନା କଲେ ଚାଷୀ ଅଧିନ ଲାଭ ପାଇପାରିବ ।
ବର୍ତ୍ତମାନ ଖରିଫ ଚାଷ ପାଇଁ ଚାଷୀମାନେ କ'ଣ ଫସଲ ଯୋଜନା କରିବେ ସେ ବିଷୟରେ ଆସନ୍ତୁ ଜାଣିବା ।
ପାଣିପାଗ ବିଭାଗର ଖବରରୁ ପ୍ରକାଶ ଯେ, ଚଳିତବର୍ଷର ମୌସୁମୀ ପ୍ରଦାନ ଖରିଫ ଫସଲ ପାଇଁ ଅନୁକୂଳ ରହିବ । ତେଣୁ ଚାଷୀମାନେ ଆଗାମୀ ଖରିଫ ଋତୁର ଚାଷବାସ ପାଇଁ ପ୍ରସ୍ତୁତି କରିବା ଆବଶ୍ୟକ ।
ଜମିର କିସମ, ଜଳସେଚନ ସୁବିଧା ଆର୍ଥିକ ସମ୍ବଳ ତଥା ବିକ୍ରିବଟାର ସୁବିଧାକୁ ଦୃଷ୍ଟିରେ ରଖି କେଉଁ ଫସଲ କଲେ ଲାଭବାନ୍ ହୋଇପାରିବେ ସେଥିପାଇଁ ଏକ ଫସଲ ଖସଡା ପ୍ରସ୍ତୁତ କରନ୍ତୁ । ବିଶେଷ କରି ଢିପ ଜମିରେ ଅଣଧାନ ଫସଲ ଯଥା : ମୁଗ, ବିରି, ହରଡ, ମକା, ମାଣ୍ଡିଆ, ଚିନାବାଦାମ, ପନିପରିବା ଜାତୀୟ ଫସଲ କଲେ ଧାନ ଅପେକ୍ଷା ଅଧିକା ଲାଭ ମିଳିଥାଏ । ଏହାବ୍ୟତୀତ ହରଡ + ମାଣ୍ଡିଆ, ହରଡ + ଧାନ, ମକା + ଚିନାବାଦାମ ଆଦି ଫସଲର ମିଶ୍ରିତ ଚାଷ କଲେ ଗୋଟିକିଆ ଫସଲ ଅପେକ୍ଷା ଅଧିକ ଲାଭ ମିଳିପାରିବ । ମଝିଆଳି ଜମିରେ ୧୨୦ – ୧୩୦ ଅମଳ ହେଉଥିବା ଧାନ ଫସଲ କଲେ ରବିଋତୁରେ ସୋରିଷ, ଚିନାବାଦାମ, ମୁଗ, ବିରି, ଆଳୁ ଓ ପନିପରିବା ଜାତୀୟ ଫସଲ କରିବା ପାଇଁ ସୁବିଧାଜନକ ହୋଇପାରିବ ।
ଅଧିକ ଅମଳ ପାଇବାକୁ ହେଲେ ଫସଲରେ ଉପଯୁକ୍ତ ପରିମାଣ ଖତ ଓ ସାର ପ୍ରୟୋଗ କରିବା ଦରକାର । ମାଟି ପରୀକ୍ଷା କରି ଜମିରେ କେତେ ପରିମାଣର ଯବକ୍ଷାରଜାନ, ପଟାସ ଓ ଫସଫରସ୍ ରହିଛି ସେ କଥା ଜାଣିଲେ ଅନୁମୋଦିତ ପରିମାଣର ସାର ପ୍ରୟୋଗ କରିବାରେ ସୁବିଧାଜନକ ହୋଇପାରିବ । ତେଣୁ ନମୁନା ମାଟି ସଂଗ୍ରହ କରି ମୃତ୍ତିକା ପରୀକ୍ଷାଗାରକୁ ପଠାନ୍ତୁ । କୃଷି ବିଦ୍ୟାଳୟର ଆଞ୍ଚଳିକ ଗବେଷଣା କେନ୍ଦ୍ର, ଗ୍ରାମ୍ୟ କୃଷି କର୍ମୀ କିମ୍ବା କୃଷି ଅଧିକାରୀଙ୍କ ସହ ପରାମର୍ଶ କଲେ ନମୁନା ମାଟି ସହଜରେ ସଂଗ୍ରହ କରିପାରିବେ ।
ଲାଭ ପାଇବାକୁ ହେଲେ ଅଧିକ ଅମଳକ୍ଷମ ବିହନ, ଖତସାର, ଶସ୍ୟ ସଂରକ୍ଷଣ ବ୍ୟବସ୍ଥା ପାଇଁ କୀଟନାଶକ, କୃଷି ଯନ୍ତ୍ରପାତିର ଆବଶ୍ୟକତା ରହିଛି । ବିଶେଷକରି ରୋପପୋକ ନିରୋଧକାରୀ ଅଧିକ ଅମଳକ୍ଷମ ବିହନ ବ୍ୟବହାର କରିବା ଦ୍ଵାରା ଅଧିକ ଅମଳ ମିଳିଥାଏ । ଚାଷୀମାନେ ଜମିର କିସମ, ଜଳସେଚନର ସୁବିଧା, ଆଞ୍ଚଳିକ ରୋପ ପୋକ ସମସ୍ୟା ଆଦିକୁ ଦୃଷ୍ଟିରେ ରଖି ନିଜ ଜମି ପାଇଁ ବିହନ କିସମ ନିର୍ଣ୍ଣୟ କରିବା ଦରକାର । ସାର ସଂଗ୍ରହ କରିବା କ୍ଷେତ୍ରରେ ଚାଷୀମାନେ ଅବହେଳା କରି ଦରକାର ବେଳେ ଅସୁବିଧାରେ ପଡନ୍ତି । ବଜାରରେ ଯେତିକି ସାର ଉପଲବ୍ଧ ହେଉଛି ବେଳେ ବେଳେ ତା’ଠାରୁ ଅଧିକ ସାର ଚାଷୀମାନେ ଆବଶ୍ୟକ କରୁଛନ୍ତି । ତେଣୁ ବେଳେବେଳେ ସାର କଳାବଜାର ହେବାର ଖବର ପ୍ରକାଶ ପାଉଛି । ତେଣୁ ସାର ସଂଗ୍ରହ କରି ରଖନ୍ତୁ । ଆଜିକାଲି ମଞ୍ଜି ବୁଣିବା, ଘାସ ବାଛିବା, ଧାନ ରୋଇବା, ଧାନ କାଟିବା, ଅମଳ କରିବା, କୀଟନାଶକ ସ୍ପ୍ରେ କରିବା ପାଇଁ ଯନ୍ତ୍ରପାତି ଉଦ୍ଭାବିତ ହେଲାଣି । ଏଗୁଡିକ ବ୍ୟବହାର କଲେ ସହଜରେ ଓ କମ୍ ସମୟରେ କମ୍ ଖର୍ଚ୍ଚ ଚାଷକାମ ହୋଇପାରିବ ।
ଫଳ ଚାଷରୁ ଅଧିକ ଲାଭ ମିଳିପାରିବ । ଫଳଗଛ ଲଗାଇବାକୁ ଇଚ୍ଛୁକ ଚାଷୀମାନେ ଗାତଖୋଳା କାମ ଆରମ୍ଭ କରିବା ଦରକାର । ନଡିଆ, ଆମ୍ବ, ଲେମ୍ବୁ, କଦଳୀ, ସେପେଟା, ପିଜୁଳି, ସପୁରୀ, ଅମୃତଭଣ୍ଡା, ଆଦି ଫଳ ଲଗାଇବା ପାଇଁ ଚାରା ସଂଗ୍ରହ କରନ୍ତୁ । ଉଦ୍ୟାନ ବିଭାଗ ସହ ସମ୍ପର୍କ କରି ଅଧିକ ଅମଳକ୍ଷମ ଚାରାଗଛ ସଂଗ୍ରହ କରନ୍ତୁ । ପନିପରିବା ଚାଷ ପାଇଁ ମଧ୍ୟ ପ୍ରସ୍ତୁତ ହେବା ଆବଶ୍ୟକ । ଧାନ ଫସଲର ଅଭାବି ବିକ୍ରି ଯୋଗୁଁ ଚାଷୀମାନେ ହନ୍ତସନ୍ତ ହେଉଛନ୍ତି । ତେଣୁ ବିକଳ୍ପ ଫସଲ ଭାବରେ ପନିପରିବା ଚାଷ କଲେ ଅଧିକ ଲାଭ ପାଇପାରିବେ ।
ଓଡିଶାର ଚାଷୀମାନେ ଆର୍ଥିକ ଦୃଷ୍ଟିରୁ ସ୍ଵଚ୍ଛଳ ନୁହନ୍ତି । ତେଣୁ ସମବାୟ ବ୍ୟାଙ୍କ ଓ ଜାତୀୟକରଣ ବ୍ୟାଙ୍କଗୁଡିକରୁ ଆବଶ୍ୟକ ଋଣ ପାଇଁ ଆବେଦନ କରନ୍ତୁ । ପୁରୁଣା ଋଣ ସୁଝି ଦେଲେ ନୂଆ ଋଣ ସହଜରେ ପାଇବା ସୁଝିବା ସହଜସାଧ୍ୟ ହୋଇପାରିବ । ବାରମ୍ବାର ଋଣ ମଞ୍ଜୁର ପାଇଁ ବ୍ୟାଙ୍କରୁ ଦୌଡିବା ଆବଶ୍ୟକ ପଡିବ ନାହିଁ । ତେଣୁ ଚାଷ ପାଇଁ ସମ୍ବଳ ସକାଶେ ସମବାୟ ବ୍ୟାଙ୍କରୁ ବିଷାନ କ୍ରେଡ଼ିଟ କାର୍ଡ଼ ସଂଗ୍ରହ କରନ୍ତୁ ।
ଆଧାର – ଦୈନିକ ପ୍ରମେୟ
Last Modified : 1/26/2020