ଚାକିରି ଚାଲିଯିବା ପରେ ପୁଣି କ’ଣ କରି ରୋଜଗାର କରିବେ,କିପରି ପରିବାର ଚଳାଇବେ କିଛି ବୁଦ୍ଧିବାଟ ଦିଶୁ ନଥିଲା । ଚାଷ କାର୍ଯ୍ୟ ଲାଗି ଆଗ୍ରହ ଥିଲେବି ଆବଶ୍ୟକ ଜମି ମଧ୍ୟ ନଥିଲା । ତଥାପି ମାଛ ଚାଷ ପାଇଁ ମନ ବଳାଇଲେ । ଆଉ ବର୍ଷ କେଇଟା ମଧ୍ୟରେ ସମସ୍ତ ପ୍ରତିକୂଳ ଅବସ୍ଥା ଭିତରେ ବି ନିଜକୁ ଜଣେ ସଫଳ ଚାଷୀ ଭାବେ ପ୍ରତିପାଦିତ କରାଇବାରେ ସକ୍ଷମ ହୋଇଛନ୍ତି ସେ । ପୁଣି ଆଉ କେତେଜଣଙ୍କ ପାଇଁ ରୋଜଗାରର ବାଟ ଦେଖାଇବାରେ ସମର୍ଥ ହୋଇଛନ୍ତି । ସେ ହେଲେ ଦେବେନ୍ଦ୍ର କଳାପାହାଡ । ପିତା ସୁରେନ୍ଦ୍ର ପ୍ରସାଦ କଳାପାହାଡ ଓ ମା’ଙ୍କ ନାମ ପ୍ରେମଶିଳା କଳାପାହାଡ । ଘର ବାଲେଶ୍ଵର ଜିଲ୍ଲା ଖଇରାବ୍ଲକ ଅନ୍ତର୍ଗତ ଅଚ୍ୟୁତପୁରରେ । ଖଇରା କଲେଜରୁ ବି.ଏ ପାସ କରିବା ପରେ ଉଠା ଜଳସେଚନ ବିଭାଗରେ ନିଯୁକ୍ତ ପାଇଥିଲେ । ମାତ୍ର ୨୦୦୩ ରେ ସରକାରଙ୍କ ତରଫରୁ ସେହି ବିଭାଗର ଅନେକ କର୍ମଚାରୀଙ୍କୁ ଛଟେଇ କରି ଦିଆଗଲା । ସେଥିରେ ଦେବେନ୍ଦ୍ରଙ୍କ ନାମ ଥିଲା । ଚାକିରି ଚାଲିଯିବା ପରେ ମୁଣ୍ଡରେ ଚଡକ ପଡିବା ଅବସ୍ଥା । କିଛିଦିନର ଅସ୍ଥିର ଅବସ୍ଥା ପରେ ମାଛଚାଷକୁ ରୋଜଗାରର ମାଧ୍ୟମ କରିବା ଲାଗି ଅଣ୍ଟା ଭିଡିଲେ ଦେବେନ୍ଦ୍ର ।
ଏଥିପାଇଁ ଗାଁର କିଛି ବ୍ୟକ୍ତିଙ୍କଠାରୁ ସେ ଚାଷ ଉଦେଶ୍ୟରେ ଲିଜସୂତ୍ରରେ କିଛି ବର୍ଷପାଇଁ ଜମି ବନ୍ଧକ ଆଣି ସେଥିରେ ପୋଖରୀ ଖନନ କରି ମାଛ ଚାଷ କଲେ ।
ଏଥିପାଇଁ ସେ ଅଚ୍ୟୁତ ପୁରର ୪ଜଣ ବ୍ୟକ୍ତିଙ୍କଠାରୁ ୧୩ ଏକର ଜମି ଲିଜ ସୂତ୍ରରେ ଆଣିଲେ । ପୁଣି ରୁଣ ପାଇଁ ବ୍ୟାଙ୍କକୁ ଯାଇ ଯାଇ ଶେଷରେ ମିଳିଲା ୭ଲକ୍ଷ ଟଙ୍କା । ୧୦ ଏକର ଜମିରେ ୬ଟି ପୋଖରୀ ଖୋଲାଇଲେ । ପୁଣି ସେଥିରେ ବୋରୱେଲ ଖୋଳାଇବା, ଟ୍ରାନ୍ସଫରମର ବସାଇବା ରାସ୍ତା ତିଆରି ଇତ୍ୟାଦିରେ ପ୍ରାୟ ୪୦ଲକ୍ଷ ଟଙ୍କା ଖର୍ଚ୍ଚ ହୋଇଗଲା । ରୁଣ ବ୍ୟତୀତ ବନ୍ଧୁ ବାନ୍ଧବଙ୍କଠାରୁ ହାତ ଉଧାର ଆଣିବାକୁ ପଡିଲା । ତେବେ ମତ୍ସ୍ୟଅଧିକାରୀଙ୍କଠାରୁ ପରାମର୍ଶ ନେଇ ସେସବୁ ପୋଖରୀରେ ରୋହି,ମିରକାଳି, ଭାକୁର ଆଦି ବିଭିନ୍ନ ମଧୁର ମାଛ ଚାଷ କଲେ । ବଳକା ଜମିରେ ପନିପରିବା ଚାଷ ତା’ପରେ ଗୋପାଳନକୁ ବି ସାମିଲ କଲେ । ଧୀରେ ଧୀରେ ପରିସ୍ଥିତି ସୁଧୁରିବାକୁ ଲାଗିଲା । ଅକ୍ଲାନ୍ତ ପରିଶ୍ରମର ମୂଲ୍ୟ ମିଳିବା ଆରମ୍ଭ ହେଲା । ସ୍ୱାବଲମ୍ବୀ ହେଲେ ଦେବେନ୍ଦ୍ର । ମାଛଗୁଡିକୁ ବାରିପଦା ବଜାରକୁ ବିକ୍ରି ପାଇଁ ପଠାଉଥିଲା ବେଳେ ପନିପରିବାକୁ ତୁଡିଗଡିଆ ବଜାର ଓ ଗାଈକ୍ଷୀରକୁ ଖଇରାର ଛେନା ବ୍ୟବସାୟୀଙ୍କୁ ବିକ୍ରି କରନ୍ତି । ସମସ୍ତ ଖର୍ଚ୍ଚକୁ ବାଦଦେଲେ ମାଛଚାଷରୁ ବର୍ଷକୁ 12ଲକ୍ଷ ଟଙ୍କା , ଗୋପାଳନରୁ ୧ଲକ୍ଷ ଟଙ୍କା ଲାଭ ମିଳୁଥିବା କୁହନ୍ତି ଦେବେନ୍ଦ୍ର । ଏବେ ଖଇରା, ସୋର ଓ ଔପଦା ବ୍ଲକର ଅନ୍ୟୁନ ୨୦୦ ମତ୍ସ୍ୟ ଚାଷୀଙ୍କୁ ସେ ସୁଲଭ ମୂଲ୍ୟରେ ମୁଣ୍ଡା ଯାଆଁଳ ଯୋଗାଇବା ସହ ସେମାନଙ୍କୁ ଏହି ଚାଷ ବିଷୟରେ ବୈଷୟିକ ପରାମର୍ଶ ମଧ୍ୟ ଦେଉଛନ୍ତି । ତାଙ୍କର ଏଭଳି କାର୍ଯ୍ୟ ଲାଗି ଖଇରା ପ୍ରତିଭା ପରିବାର ୨୦୧୧ ଓ ୨୦୧୨ ମସିହାରେ ଜିଲ୍ଲାର ଶ୍ରେଷ୍ଠ ମତ୍ସ୍ୟଚାଷୀ ଭାବେ ପୁରଷ୍କୃତ ହୋଇଥିବା ଦେବେନ୍ଦ୍ର ୨୦୧୫ ରେ ରାଜ୍ୟ କୃଷିମହୋତ୍ସବରେ ମୁଖ୍ୟମନ୍ତ୍ରୀଙ୍କ ଦ୍ଵାରା ସମ୍ବର୍ଦ୍ଧିତ ହୋଇଛନ୍ତି । ତେବେ ସ୍ଥାନୀୟ ଅଞ୍ଚଳରେ ମତ୍ସ୍ୟଚାଷୀଙ୍କର କେତେକ ସମସ୍ୟା ପ୍ରତି ଦୃଷ୍ଟି ଦିଆଗଲେ ଆହୁରି ଅନେକେ ବେକାର ଏଚାଷ ପ୍ରତି ଆଗ୍ରହ ପ୍ରକାଶ କରନ୍ତେ ବୋଲି ସେ କୁହନ୍ତି । ତେବେ ପରିଶ୍ରମର ନିଶ୍ଚିତ ମୂଲ୍ୟ ରହିଛି ବୋଲି ଦୃଢୋକ୍ତି ବ୍ୟକ୍ତ କରନ୍ତି ଏହି ସଫଳ ଚାଷୀ ଦେବେନ୍ଦ୍ର ।
ଆଧାର : ଉତ୍କଳବନ୍ଧୁ ପଣ୍ଡା
Last Modified : 1/26/2020