ଅନ୍ ଲାଇନ ରୋଜଗାର

ଇନ୍ ଷ୍ଟାଗ୍ରାମ

ମଣିଷ ଜୀବନକୁ ଇଣ୍ଟରନେଟ୍ ଯେତିକି ସହଜ କରିଦେଇଛି, ସେହିପରି ରୋଜଗାର ଲାଗି ନୂଆନୂଆ ବାତ ମଧ୍ୟ ଦେଖାଇଛି  । ଯେମିତି ସେଲ୍ଫିରେ କେବଳ ନିଜ ଫଟୋ ଉଠାଇବେନି କି ଇନଷ୍ଟାଗ୍ରାମରେ କେବଳ ପୋଷ୍ଟ ସେୟାର କରିବେନି; ଏଥିରୁ ଲକ୍ଷାଧିକ ଟଙ୍କା ରୋଜଗାର ମଧ୍ୟ କରିପାରିବେ  ।

ଫଟୋ ଶେୟାରିଂ ଆପ୍ ଇନଷ୍ଟାଗ୍ରାମ ନିକଟରେ ଭାରତରେ ପ୍ରଥମ ଇନଷ୍ଟାଗ୍ରାମ ଆୱାର୍ଡ ସମ୍ପର୍କରେ ଘୋଷଣା କରିଛି  । ଏଥିରେ ପ୍ରଥମ ସ୍ଥାନର ବିଜେତା ହୋଇଛନ୍ତି ଭାରତୀୟ କ୍ରିକେଟ ଟିମ୍ ର ଅଧିନାୟକ ବିରାଟ କୋହଲି  । କେବଳ ଲୋକପ୍ରିୟତା ନୁହେଁ, ଇନଷ୍ଟାଗ୍ରାମ ମାଧ୍ୟମରେ ରୋଜଗାର କରିବାରେ ବି ବିରାଟ ଆଗୁଆ  । ଫୋର୍ବସର ଏକ ରିପୋର୍ଟ ଅନୁସାରେ, ବିରାଟ କୋହଲି ନିଜର ପ୍ରତି ପୋଷ୍ଟରୁ ପ୍ରାୟ ୩.୨ କୋଟି ଟଙ୍କା ରୋଜଗାର କରିଥାନ୍ତି  । ତାଙ୍କ ପୃଷ୍ଠାରେ ୟୁଜର୍ସ ଏନଗେଜମେଣ୍ଟ ବା ବ୍ୟବହାରୀକାରୀଙ୍କ ଉପସ୍ଥିତି ଏବଂ ପ୍ରଦତ୍ତ ବିଜ୍ଞାପନରୁ ସେ ଏହି ରୋଜଗାର କରିପାରନ୍ତି  । ଅବଶ୍ୟ ଇନଷ୍ଟାଗ୍ରାମରେ ଏପରି ରୋଜଗାର କରିବା ସହଜ ହୋଇନଥାଏ, କିନ୍ତୁ ଏହା ଅସମ୍ଭବ ନୁହେଁ  । ଏହି ଆକାଉଣ୍ଟକୁ ପେସାଗତ ଭାବେ ପରିଚାଳନା କରିପାରିଲେ ଭଲ ରୋଜଗାର ହୋଇପାରିବ  । ଇନଷ୍ଟାଗ୍ରାମରେ ଦୁଇପ୍ରକାର ଆକାଉଣ୍ଟ କରାଯାଇଥାଏ – ବ୍ୟକ୍ତିଗତ ଏବଂ ବ୍ୟବସାୟିକ  । ବ୍ୟବସାୟିକ ଆକାଉଣ୍ଟରେ ନିଜ ପୋଷ୍ଟକୁ ବିଜ୍ଞାପନ ସହାୟତାରେ ପ୍ରମୋଟ କରିପାରିବେ  । ଏଥିସହିତ ଫାଲୋଅରମାନଙ୍କ ବିଶ୍ଳେଷଣ ବି କରିପାରିବେ  ଏବଂ ସେମାନେ ଆପଣଙ୍କ ପୋଷ୍ଟ ସହିତ କେତେ ଜଡିତ ରହୁଛନ୍ତି, ଏହାର ରିପୋର୍ଟ ମଧ୍ୟ ଆପଣଙ୍କ ପାଖରେ ପହଞ୍ଚିବ  । ଅବଶ୍ୟ ଇନଷ୍ଟାଗ୍ରାମରେ ବ୍ୟବସାୟ କରିବା ଲାଗି କିଛି ପରୀକ୍ଷାନିରୀକ୍ଷା କରିବାକୁ ହେବ  । ପ୍ରଥମେ ଜାଣିବାକୁ ପଡିବ ଯେ ଟାର୍ଗେଟ ଅଡିଏନ୍ସ ବା ଯେଉଁମାନଙ୍କ ପାଖରେ ପହଞ୍ଚିବାକୁ ଲକ୍ଷ୍ୟ ରଖିଛନ୍ତି, ସେମାନେ କେମିତି ଏବଂ ସେମାନେ କେଉଁ ସମୟରେ ଅନଲାଇନ୍ ରହିଥାନ୍ତି  ତଥା କିପରି ପୋଷ୍ଟ ପସନ୍ଦ କରନ୍ତି  । ଏହି ତଥ୍ୟ ଜାଣିପାରିଲେ ନିଜ ଇନଷ୍ଟାଗ୍ରାମ ପେଜ୍ କୁ ବ୍ୟବସ୍ଥିତ କରିପାରିବେ  । ଯେତେବେଳେ ବି କୌଣସି ପୋଷ୍ଟ ଅପଡେଟ୍ କରିବେ, ବିଷୟ ସମ୍ବନ୍ଧୀୟ ହ୍ୟାସଟ୍ୟାଗ୍  ବ୍ୟବହାର କରିବା ଉଚିତ  । ଗୋଟିଏ ପୋଷ୍ଟରେ ୩୦ରୁ ଅଧିକ ହ୍ୟାସଟ୍ୟାଗ୍ ବ୍ୟବହାର କରାଯାଇପାରିବ ନାହିଁ  ।

ଫଲୋଅର ବଢାଇବା ପାଇଁ

• ଫଟୋ ଲାଇକ୍ କରନ୍ତୁ

ଅନ୍ୟମାନଙ୍କ ଇନଷ୍ଟାଗ୍ରାମ ପେଜ୍ ରର ଆସିଥିବା ପୋଷ୍ଟକୁ ବି ଲାଇକ୍ କରନ୍ତୁ  । କିନ୍ତୁ ଏହା ଆପଣଙ୍କ ପୃଷ୍ଠାର ବିଷୟ ସହିତ ସମ୍ବନ୍ଧିତ ଥିବା ଉଚିତ  । ଏଥିରୁ କେତେକ ଭଲ ପୋଷ୍ଟରେ କମେଣ୍ଟ ମଧ୍ୟ କରିପାରନ୍ତି  । ଏହାଦ୍ଵାରା ସେସବୁ ପୃଷ୍ଠାର ଫଲୋଅରମାନଙ୍କ ଦ୍ରୁଷ୍ଟି ଆପଣଙ୍କ ପୃଷ୍ଠା ଉପରେ ପଡିବ  ଏବଂ ସେମାନେ ଆପଣଙ୍କ ପୃଷ୍ଠାକୁ ଫଲୋ କରିବାର ସମ୍ଭାବନା ମଧ୍ୟ ବୃଦ୍ଧି ପାଇବ  ।

• ପ୍ରତିଯୋଗିତାର ସହାୟତା

ଏଥିପାଇଁ ଆପଣ ନିଜ ପୃଷ୍ଠାରେ ଦେଇଥିବା ଫଟୋ ରିପୋଷ୍ଟ କରିବା ଲାଗି ନିଜ ଫଲୋଅରମାନଙ୍କୁ କହିବାକୁ ହେବ  । ଏଥିସହିତ ସେମାନଙ୍କୁ ଜଣାଇବେ ଯେ ଆପଣଙ୍କ ପୃଷ୍ଠାକୁ ହ୍ୟାସଟ୍ୟାଗ୍ ରେ ଲେଖନ୍ତୁ  । ସେମାନେ ନିଜ ପୃଷ୍ଠାରେ ଏପରି କରିବା ମାତ୍ରେ ତାଙ୍କ ଫଲୋଅରମାନେ ଆପଣଙ୍କ ସହିତ ଜଡିତ ହୋଇଚାଲିବେ

• ଜିଓ ଟ୍ୟାଗିଙ୍ଗ

କୌଣସି ପ୍ରସିଦ୍ଧ ସ୍ଥାନକୁ ଯାଉଥିଲେ ଲୋକେସନ୍ କୁ ଜିଓଟ୍ୟାଗ କରିପାରିବେ  । ଏହାଦ୍ୱାରା ଇନଷ୍ଟାଗ୍ରାମରେ କେହି ସେ ସ୍ଥାନ ଖୋଜିଲେ ଆପଣଙ୍କ ପୃଷ୍ଠାରେ ପହଞ୍ଚିଯିବ  । ଉଭୟଙ୍କ ରୁଚି ସମାନ ହୋଇଥିଲେ ସେ ଆପଣଙ୍କୁ ଫଲୋ କରିବା ସ୍ଵାଭାବିକ  ।

ଆକାଉଣ୍ଟ ପରିଚାଳନା ଏମିତି କରନ୍ତୁ

• ଆଫିଲିଏଟେଡ ମାର୍କେଟିଂ

ଏଥିରେ ନିଜ ଇନଷ୍ଟାଗ୍ରାମ ଆକାଉଣ୍ଟରେ କେତେକ ଛୋଟ କମ୍ପାନୀର ଉତ୍ପାଦ ପ୍ରଚାର କରିପାରିବେ  । ଯଦି ଆପଣଙ୍କ ପୃଷ୍ଠାରେ ଏହି କମ୍ପାନୀର ଉତ୍ପାଦ ବିକ୍ରି ହେଲା ତେବେ ଆପଣଙ୍କୁ ଅର୍ଥ ମିଳିଥାଏ  । ଉତ୍ପାଦ ଆପଣଙ୍କ ଆକାଉଣ୍ଟରୁ ବିକ୍ରି ହୋଇଛି ବୋଲି ପ୍ରମୋ କୋଡ୍ କିମ୍ବା ରେଫରାଲ ଲିଙ୍କ୍ ରୁ ଜଣାପଡେ  । ଇନଷ୍ଟାଗ୍ରାମ ଆପଣଙ୍କୁ ପୋଷ୍ଟରେ ଲିଙ୍କ୍ ଶେୟାର କରିବାର ଅନୁମତି ଦେଉନଥିବାରୁ ପୋଷ୍ଟ କ୍ୟାପସନରେ ପ୍ରମୋ କୋଡ୍ ବ୍ୟବହାର କରିପାରିବେ  ।

• ପ୍ରଭାବଶାଳୀ ହୁଅନ୍ତୁ

ଇନଷ୍ଟାଗ୍ରାମରେ କିଛି ବିଶେଷ ଭିଡିଓ କିମ୍ବା ଫଟୋ (ପର୍ଯ୍ୟଟନ, ଖାଦ୍ୟ ଇତ୍ୟାଦି ଆଧାରିତ) ଅପ୍ ଲୋଡ କଲେ ସମାନ ରୁଚି ରଖୁଥିବା ବ୍ୟକ୍ତି ଏହି ଆକାଉଣ୍ଟକୁ ଫଲୋ କରିଥାନ୍ତି  । ଯଦି ଆପଣଙ୍କ ଆକାଉଣ୍ଟ ଲୋକପ୍ରିୟ ହୋଇପାରିଲା ତେବେ ଆପଣ ଇନଫ୍ଲୁଏନ୍ସର  ବା ପ୍ରଭାବଶାଳୀ ହୋଇପାରିବେ  । ଫଳରେ ଆପଣଙ୍କ ପୃଷ୍ଠାର ବିଷୟ ସହ ଜଡିତ ବ୍ରାଣ୍ଡ ଆପଣଙ୍କ ଆକାଉଣ୍ଟରେ ନିଜ ଉତ୍ପାଦର ବିଜ୍ଞାପନ ଦେବା ଲାଗି ଆଗ୍ରହୀ ହେବେ ଏବଂ ରୋଜଗାର ବଢିବ  ।

• ଫଟୋ ବିକ୍ରି କରନ୍ତୁ

ଫଟୋଗ୍ରାଫର ଏବଂ ଗ୍ରାଫିକ ଡିଜାଇନରଙ୍କ ପାଇଁ ଇନଷ୍ଟାଗ୍ରାମରେ ରୋଜଗାରର ସୁଯୋଗ ରହିଛି  । ଏହା ଏକ କମେଣ୍ଟ ଶେୟାରିଂ ଆପ୍ ପରି କାମ କରେ  । ଇନଷ୍ଟାଗ୍ରାମ ଆକାଉଣ୍ଟରେ ଆପଣ ଫଟୋ, ଡିଜାଇନ ବିକ୍ରି କରିପାରିବେ  । ଏଥିପାଇଁ କେବଳ ଏଗୁଡ଼ିକୁ ଆକାଉଣ୍ଟରେ ଅପ୍ ଲୋଡ କରି ଉପଯୁକ୍ତ ହ୍ୟାସଟ୍ୟାଗ୍ ଉପଯୋଗ କରିବାକୁ ହେବ, ଯେପରି ଏହା ଅଧିକ ଲୋକଙ୍କ ପାଖରେ ପହଞ୍ଚିପାରିବ  ।