ନ୍ୟୁଟ୍ରିଶନିଷ୍ଟ ଭାବେ କ୍ୟାରିୟର

ନ୍ୟୁଟ୍ରିଶନିଷ୍ଟ

ସମୟକ୍ରମେ ଲୋକମାନଙ୍କ ମଧ୍ୟରେ ସ୍ୱାସ୍ଥ୍ୟ ସଚେତନତା ବଢୁଥିବା ଯୋଗୁ ଏକ ନୂଆ ବୃତ୍ତିର ଚାହିଦା ବୃଦ୍ଧି ପାଇବାରେ ଲାଗିଛି ।  ତାହା ହେଉଛି ଡାଏଟିକ୍ସ ବା ଆହାର ବିଜ୍ଞାନ । ଏଥିରେ ଆହାର ବିଶେଷଜ୍ଞ (ଡାଏଟିସିଆନ୍) ଓ ପୁଷ୍ଟି ବିଜ୍ଞାନୀ (ନ୍ୟୁଟ୍ରିଶନିଷ୍ଟ)ଭାବେ କ୍ୟାରିୟର ଗଢି ଉତ୍ତମ ଅର୍ଥ ଉପାର୍ଜନ କରିବାକୁ ସୁଯୋଗ ରହିଛି ।

ଡାଏଟିସିଆନ୍ ଓ ନ୍ୟୁଟ୍ରିଶନିଷ୍ଟ ମାନେ ଲୋକମାନଙ୍କୁ ଉପଯୁକ୍ତ ଖାଦ୍ୟଅଭ୍ୟାସ ଏବଂ ଜୀବନଶୈଳୀର ମାନ ବୃଦ୍ଧି କ୍ଷେତ୍ରରେ ସାହାଯ୍ୟ କରିଥାନ୍ତି । ବୟସ, ଦୁର୍ବଳତା  ଏବଂ କାର୍ଯ୍ୟ ରୁଟିନ୍ ଅନୁଯାୟୀ ସେମାନେ ଲୋକମାନଙ୍କୁ ଖାଦ୍ୟ ନେବା ପାଇଁ ପରାମର୍ଶ ଦେଇଥାନ୍ତି । ସୁସ୍ଥକର ଖାଦ୍ୟ  ଚୟନ ଏବଂ ପ୍ରସ୍ତୁତି କ୍ଷେତ୍ରରେ ଏମାନେ ଲୋକମାନଙ୍କୁ ପରାମର୍ଶ ଦେଇଥାନ୍ତି । ଶିକ୍ଷା ଏବଂ ଗବେଷଣା ମାଧ୍ୟମରେ ଡାଏଟିସିଆନ୍ ମାନେ ପୁଷ୍ଟିକର ଖାଦ୍ୟ ଅଭ୍ୟାସକୁ ପ୍ରୋତ୍ସାହିତ  କରିଥାନ୍ତି । ହସ୍ପିଟାଲମାନଙ୍କରେ ଏମାନେ ରୋଗୀମାନଙ୍କ ପାଇଁ କେଉଁ ଖାଦ୍ୟ  ଠିକ୍ ହେବ ତାହା ଧାର୍ଯ୍ୟ କରିଥାନ୍ତି । ବିଭିନ୍ନ ଟ୍ରେନିଂ କ୍ୟାମ୍ପରେ କ୍ରୀଡାବିତ୍ ଏବଂ ପର୍ବତାରୋହୀମାନଙ୍କ ଲାଗି ଏମାନେ ଖାଦ୍ୟ ନିର୍ଦ୍ଧାରଣ କରିଥାନ୍ତି । ଖାଦ୍ୟର ପୋଷାକ ତତ୍ତ୍ଵ ଉପରେ ଏମାନେ ଗବେଷଣାମାନ କରିଥାନ୍ତି । ଏହାଦ୍ୱାରା ଲୋକମାନଙ୍କ ଲାଗି ଏକ ସନ୍ତୁଳିତ ଆହାର ଧାର୍ଯ୍ୟ  କରିବା ସେମାନଙ୍କ ପାଇଁ ସମ୍ଭବ ହୋଇଥାଏ । ମନୁଷ୍ୟ ଶରୀର ପାଇଁ ଆବଶ୍ୟକ ହେଉଥିବା ଭିଟାମିନ୍ ଏବଂ ଧାତବଲବଣ ଉପରେ ସେମାନଙ୍କର ସବିଶେଷ  ଜ୍ଞାନ ରହିଥାଏ ।  କେଉଁ ଖାଦ୍ୟରେ କି ପ୍ରକାର ଭିଟାମିନ୍ ଏବଂ ଧାତବଲବଣ ରହିଛି ଓ କାହାପାଇଁ କି ପ୍ରକାର ଖାଦ୍ୟ ଉପକାରୀ ତାହା ସେମାନଙ୍କୁ ଜଣାଥାଏ । ହଜମ ପ୍ରକ୍ରିୟା ଉପରେ ସେମାନେ ଜ୍ଞାନ ହାସଲ କରିଥାନ୍ତି । କେଉଁ ପ୍ରକାର ପ୍ରତିକ୍ରିୟା ପଡେ ଏବଂ ଦେହ  ପାଇଁ କେଉଁ ଖାଦ୍ୟ କ୍ଷତିକାରକ ଉକ୍ତ ବିଷୟରେ ସେମାନେ ଜ୍ଞାନ ଆହରଣ କରିଥାନ୍ତି । ଏକ ଉପଯୁକ୍ତ ଡାଏଟ୍ ପ୍ରୋଗ୍ରାମ୍  ଦ୍ଵାରା କିପରି ରୋଗମୁକ୍ତ ହୋଇପାରିବା ତାହାକୁ  ନେଇ ଡାଏଟିସିଆନ୍ ପରାମର୍ଶ ଦେଇଥାଆନ୍ତି । ମୋଟାପଣ, ଶିଶୁରୋଗ ଚିକିତ୍ସା ଏବଂ ମଧୁମେହ ରୋଗ ଆଦି  କ୍ଷେତ୍ରରେ ଡାଏଟିସିଆନ୍ ଏବଂ ନ୍ୟୁଟ୍ରିଶନିଷ୍ଟମାନଙ୍କ ସହଯୋଗ ଲୋଡାଯାଇଥାଏ ।

ନୂଆ ଉତ୍ପାଦକୁ ନେଇ ଗବେଷଣା କରିବା ପାଇଁ ଖାଦ୍ୟ ଉତ୍ପାଦ ପ୍ରସ୍ତୁତିରେ ଜଡିତ ସଂସ୍ଥାମାନେ ନ୍ୟୁଟ୍ରିଶନିଷ୍ଟ ଏବଂ ଡାଏଟିସିଆନ୍ ମାନଙ୍କ ସେବା ଗ୍ରହଣ କରିଥାନ୍ତି । ଗଣମାଧ୍ୟମ କ୍ଷେତ୍ରରେ ମଧ୍ୟ ଏମାନଙ୍କ ପାଇଁ ଢେର ସୁଯୋଗ ରହିଛି । ସୁସ୍ଥ ଜୀବନଶୈଳୀ ଉପରେ ସୂଚନା ପ୍ରସାର କ୍ଷେତ୍ରରେ ଏମାନଙ୍କର ଗୁରୁତ୍ଵପୂର୍ଣ୍ଣ ଭୂମିକା ରହିଛି । ହସ୍ପିଟାଲ, ଖାଦ୍ୟ କମ୍ପାନୀଗୁଡିକର ରିସର୍ଚ୍ଚ ଲ୍ୟାବ୍, କ୍ୟାଟରିଂ ବିଭାଗ ଏବଂ ରିକ୍ରିଏଶନ୍ କ୍ଲବ୍ ମାନଙ୍କରେ ନିଯୁକ୍ତି ସୁଯୋଗ ରହିଛି । କଲେଜ ଏବଂ ବିଶ୍ଵବିଦ୍ୟାଳୟମାନଙ୍କରେ ଏମାନେ ନ୍ୟୁଟ୍ରିଶନ୍ ଏବଂ ଡାଏଟିକ୍ସ ବିଜ୍ଞାନ ଉପରେ ପଢାଇପାରିବେ ।  ଏମାନେ ଉପଦେଷ୍ଟା ଭାବେ କାର୍ଯ୍ୟ କରିପାରିବେ ତଥା ଘରୋଇ ଭାବେ ପ୍ରାକ୍ଟିସ୍ ମଧ୍ୟ କରିପାରିବେ । ସ୍ୱାସ୍ଥ୍ୟ ଏବଂ ଫିଟ୍ନେସ୍ କୁ ନେଇ ଆଧୁନିକ ମନୁଷ୍ୟଙ୍କ ମଧ୍ୟରେ ଯେଉଁମାତ୍ରାରେ ସଚେତନତା ବଢୁଛି ନ୍ୟୁଟ୍ରିସନିଷ୍ଟ ଏବଂ ଡାଏଟିସିଆନ୍ ମାନଙ୍କ ପାଇଁ ସୁଯୋଗ ସେହି ମାତ୍ରାରେ ବଢିଚାଲିଛି ।

ଶିକ୍ଷାଗତ ଯୋଗ୍ୟତା ଏବଂ ପାଠ୍ୟକ୍ରମ

ଡାଏଟିକ୍ସ ଏବଂ ନ୍ୟୁଟ୍ରିଶନ୍ ରେ କ୍ୟାରିୟର କରିବାକୁ ଚାହୁଁଥିବା ଛାତ୍ରୀଛାତ୍ରମାନେ ସ୍ନାତକ ଏବଂ ସ୍ନାତକୋତ୍ତର ସ୍ତରରେ ଗୃହ ବିଜ୍ଞାନ କିମ୍ବା ଆହାର ଏବଂ ପୁଷ୍ଟି ବିଜ୍ଞାନ, ଖାଦ୍ୟ ବିଜ୍ଞାନରେ କୋର୍ସ କରିଥିବା ଦରକାର । ଡାଏଟିକ୍ସ ଏବଂ ନ୍ୟୁଟ୍ରିଶନ୍ ରେ ବ୍ୟାଚ୍ଲର କୋର୍ସରେ ନାମ ଲେଖାଇବାକୁ ଚାହୁଁଥିବା ଛାତ୍ରୀଛାତ୍ରମାନେ ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ଗୃହ ବିଜ୍ଞାନ ଏବଂ ଜୀବ ବିଜ୍ଞାନ ଆଦି ବିଷୟ ରଖି ଯୁକ୍ତ୨ ପାସ୍ କରିଥିବା ଦରକାର ।  ଗୃହ ବିଜ୍ଞାନ, ଖାଦ୍ୟ ବିଜ୍ଞାନ ଏବଂ ଟେକ୍ନୋଲୋଜି, ମେଡ଼ିସିନ୍, ହୋଟେଲ ମ୍ୟାନେଜ୍ମେଣ୍ଟ କିମ୍ବା କ୍ୟାଟରିଂ ଟେକ୍ନୋଲୋଜିରେ ସ୍ନାତକ କରିଥିବା ଛାତ୍ରୀଛାତ୍ରଙ୍କୁ ଏ କ୍ଷେତ୍ରରେ ଅଗ୍ରାଧିକାର ଦିଆଯାଇଥାଏ । ୩ ବର୍ଷିଆ ବିଏସ୍ସି ହୋମ୍ ସାଇନ୍ସ କୋର୍ସରେ ଫୁଡ୍ ଏବଂ ନ୍ୟୁଟ୍ରିଶନ୍ ବିଷୟ ରହିଥାଏ । ଅନେକ ବିଶ୍ଵବିଦ୍ୟାଳୟ ଗୃହ ବିଜ୍ଞାନରେ ବିଏସ୍ସି ଏବଂ ଏମ୍ଏସ୍ସି ପାଠ୍ୟକ୍ରମ ପ୍ରଦାନ କରୁଛନ୍ତି ।  କେତେକ ଶିକ୍ଷାନୁଷ୍ଠାନରେ ଯୁକ୍ତ ୨ ପରେ ବିଜ୍ଞାନ ଷ୍ଟ୍ରିମ୍ ରେ ୪ ବର୍ଷିଆ ଫୁଡ୍ ଟେକ୍ନୋଲୋଜି କୋର୍ସ ଉପଲବ୍ଧ ଅଛି ।  ସ୍ନାତକୋତ୍ତର ସ୍ତରରେ ଡାଏଟିସିଆନ୍ ଏବଂ ନ୍ୟୁଟ୍ରିଶନ୍ କୋର୍ସ ୨ ବର୍ଷିଆ ମାଷ୍ଟର ପ୍ରୋଗ୍ରାମ ହୋଇପାରେ କିମ୍ବା ବର୍ଷିକିଆ ପୋଷ୍ଟ ଗ୍ରାଜୁଏଟ୍ ଡିପ୍ଲୋମା (ଡିପ୍ଲୋମା ଇନ୍ ଡାଏଟିକ୍ସ ଆଣ୍ଡ୍ ପବ୍ଲିକ୍ ହେଲ୍ଥ ନ୍ୟୁଟ୍ରିଶନ୍) ହୋଇପାରେ ।  ଖାଦ୍ୟ ବିଜ୍ଞାନ, ଗୃହ ବିଜ୍ଞାନ, ହୋଟେଲ ମ୍ୟାନେଜ୍ମେଣ୍ଟ ଏବଂ କ୍ୟାଟେରିଂ ଟେକ୍ନୋଲୋଜି, ମାଇକ୍ରୋବାୟୋଲୋଜି, ବାୟୋକେମିଷ୍ଟ୍ରି ଏବଂ ମେଡିସିନ୍ରେ  ବ୍ୟାଚଲର ଡିଗ୍ରୀ ଥିବା ଛାତ୍ରୀଛାତ୍ରମାନେ ନ୍ୟୁଟ୍ରିଶନ୍ ଏବଂ ଡାଏଟିକ୍ସ ପୋଷ୍ଟ ଗ୍ରାଜୁଏଟ୍ ସ୍ତରରେ ଡିଗ୍ରୀ କିମ୍ବା ଡିପ୍ଲୋମା କରିପାରିବେ  । ପୋଷ୍ଟ ଗ୍ରାଜୁଏଶନ୍ ପ୍ରୋଗ୍ରାମ୍ ପରେ ଜଣେ ପିଏଚଡି କରିପାରିବେ ତଥା ଫୁଡ୍ ଏବଂ ନ୍ୟୁଟ୍ରିଶନ୍ ରେ ଗବେଷଣା କରିପାରିବେ ।

ଇଣ୍ଡିଆନ୍ କାଉନ୍ସିଲ୍ ଅଫ୍ ମେଡିକାଲ ରିସର୍ଚ୍ଚ ଅଧୀନରେ ନ୍ୟାଶ୍ନାଲ ଇନଷ୍ଟିଚ୍ୟୁଟ୍ ଅଫ୍ ନ୍ୟୁଟ୍ରିଶନ୍ ଏକ ପ୍ରମୁଖ ସଂସ୍ଥାନ । ଭାରତ  ସରକାରଙ୍କ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ଅଧୀନରେ ଏହା ଏକ ସ୍ଵତନ୍ତ୍ର ସଂସ୍ଥାନ । ଏହା ପ୍ରତିବର୍ଷ ନ୍ୟୁଟ୍ରିଶନ୍ ଟ୍ରେନିଂ କୋର୍ସମାନ ପ୍ରଦାନ କରିଥାଏ । ଉକ୍ତ କ୍ଷେତ୍ରରେ ଡକ୍ଟରେଟ୍ ଡିଗ୍ରୀ ହାସଲ କରିଥିବା ଛାତ୍ରୀଛାତ୍ରମାନେ ଗବେଷଣା  ଏବଂ ଏକାଡେମିକ୍ ଫିଲ୍ଡରେ ଭଲ କ୍ୟାରିୟର କରିପାରିବେ । କେମିଷ୍ଟ୍ରି, ମାଇକ୍ରୋବାୟୋଲୋଜି, ବାୟୋକେମିଷ୍ଟ୍ରି, ହୋମ୍ ସାଇନ୍ସ, ଏଗ୍ରିକଲ୍ଚର, ହର୍ଟିକଲ୍ଚର, ଫୁଡ୍ ଟେକ୍ନୋଲୋଜି, ଫୁଡ୍ ସାଇନ୍ସ ଏବଂ ନ୍ୟୁଟ୍ରିଶନ୍, ଭେଟେରିନାରୀ ସାଇନ୍ସରେ ସ୍ନାତକୋତ୍ତର, କେମିଷ୍ଟ୍ରି/ଡାଏରୀ/ଏଗ୍ରିକଲ୍ଚର୍/ଫୁଡ୍ ଟେକ୍ନୋଲୋଜିରେ ଏମ୍.ଟେକ୍ କରିଥିବା ଛାତ୍ରୀଛାତ୍ରମାନେ ଏଠାରେ ନାମ ଲେଖାଇପାରିବେ ।

ଆଧାର – ଦୈନିକ ଧରିତ୍ରୀ