ଅନ୍ଧକାରରେ ଆଲୋକର ଶିଖା ‘ଭକ୍ତି’

ପାଠପଢା ହେଉ କି  ଅନ୍ୟ ଯେ କୌଣସି କାମ  ହେଉ ସେଥିରେ ମନୋନିବେଶ କରି ପାରଦର୍ଶିତା ହାସଲ କରବା ହେଲା ବଡ କଥା । ଅନୁକୂଳ  ପରିବେଶରେ ସମସ୍ତେ ସବୁକିଛି ହାସଲ କରିବା ସହଜ । ମାତ୍ର  ପ୍ରତିକୂଳ ପରିବେଶ ଓ ପରିସ୍ଥିତିରେ ନିଜକୁ ଠିଆ କରାଇ ପାରଦର୍ଶିତା ହାସଲ କରିବା, କୃତ୍ତିତ୍ଵ ଅର୍ଜନ  କରିବା ହେଲା ବଡକଥା ।

‘ଭକ୍ତି’ ଦିବ୍ୟାଙ୍ଗ ହୋଇ ମଧ୍ୟ କୃତି ଛାତ୍ରୀ ଭାବେ ପରିଚିତି

ସେହିପରି ଜଣେ ଦିବ୍ୟାଙ୍ଗ ହେଉଛନ୍ତି ଭକ୍ତି । ଯିଏ ପିଲାବେଳୁ ବିଶ୍ଵକୁ ଦେଖି ଆଲୋକକୁ ଉପଭୋଗ କରିବା ପରେ ଦୁଇଟି ଆଖିକୁ ହରାଇଥିଲେ ସତ, କିନ୍ତୁ ଭାଙ୍ଗିପଡି ନଥିଲେ କି ମନୋବଳକୁ ହରାଇ ନଥିଲେ । ବରଂ ନିଜର ଧୀଶକ୍ତି ବଳରେ ନିଜକୁ ସମସ୍ତଙ୍କ ମଧ୍ୟରେ ଜଣେ କୃତି ଛାତ୍ରୀ ଭାବେ ପରିଚିତି କରାଇପାରିଥିଲେ । ବର୍ତ୍ତମାନ ପରିସ୍ଥିତିରେ ଶିକ୍ଷା ଯେ ନିତାନ୍ତ ଜରୁରୀ, ଏଥିରେ କେହି ଦ୍ଵିମତ ହେବାର ନାହିଁ। ପିତାମାତା ନିଜ ପିଲାଙ୍କ ଉତ୍ତମ ଶିକ୍ଷାପ୍ରାପ୍ତି ନିମନ୍ତେ ପାଣି ପରି ଟଙ୍କା ଖର୍ଚ୍ଚ କରୁଥିବାର ଦେଖାଯାଉଛି । ହେଲେ ଖୁବ କମ ସଂଖ୍ୟକ ଛାତ୍ରଛାତ୍ରୀ ସଫଳ ହେଉଥିବା ଦେଖିବାକୁ ମିଳୁଛି। ଏଭଳି ପରିସ୍ଥିତିରେ ଜଣେ ଦିବ୍ୟାଙ୍ଗ ଛାତ୍ରୀ ନିଜ କଠିନ ପରିଶ୍ରମରେ ପ୍ରଥମ ହୋଇ ସର୍ବଭାରତୀୟ ସ୍ତରରେ ସ୍ଵତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ଭାରତର ନାମକରା ଖବରକାଗଜ ଓ ପତ୍ରିକାରେ ଏହି ଯୁବତୀ ଜଣକ ନିଜ ସଫଳତା ପାଇଁ ଶୀର୍ଷ ସ୍ନାନ ମଣ୍ଡନ କରିଛନ୍ତି । ନାଗପୁରର ଜନୈକ ସାଧାରଣ ପରିବାରର ଯୁବତୀ ହେଉଛନ୍ତି ଭକ୍ତି ଘାଟେଲେ । ନାଗପୁର ବିଶ୍ଵବିଦ୍ୟାଳୟରେ ସ୍ନାତକର ପ୍ରଥମ ବର୍ଷରେ ସ୍ଵର୍ଣ୍ଣ ପଦକ ବିଜୟିନୀ ହୋଇଛନ୍ତି ଭକ୍ତି । ଦୃଷ୍ଟିହୀନ ହେଲେ ମଧ୍ୟ ତାଙ୍କ ଆତ୍ମବିଶ୍ଵାସ ପାଇଁ ଆଜି ସେ ସଫଳ ହୋଇଛନ୍ତି ବୋଲି ପ୍ରକାଶ କରିଛନ୍ତି । ରମେଶ ଓ ସୁଷମା ଘାଟୋଲେଙ୍କ କନିଷ୍ଠା କନ୍ୟା ଭକ୍ତି । ଜନ୍ମର ୬ ମାସ ପରେ ପ୍ରଥମେ ତାଙ୍କର ବାମ ଆଖି କର୍କଟ ରୋଗାକ୍ରାନ୍ତ ହେଲା ।

ଭକ୍ତିଙ୍କ ପିତା ସ୍ଥାନୀୟ ଅଞ୍ଚଳର ସମସ୍ତ ଖ୍ୟାତନାମା ଡାକ୍ତରଙ୍କୁ ଦେଖାଇ ଚିକିତ୍ସା କରିବା ସତ୍ତ୍ୱେ କୁନିଝିଅ ଭକ୍ତି ବାମ ଆଖିଟି ହରାଇଥୁଲା। ଭକ୍ତିଙ୍କ ଡାହାଣ ଆଖି ଯେପରି କର୍କଟ ଆକ୍ରାନ୍ତ ନ ହୁଏ, ସେଥିପାଇଁ ଡାକ୍ତରମାନେ ବିଶେଷ ଚିକିତ୍ସା ଆରମ୍ଭ କରିଦେଇଥିଲେ । ବିଧିର ବିଧାନ କିନ୍ତୁ ବିଚିତ୍ର ଓ ଏହା କାହାର ଆୟତ୍ତରେ ନାହିଁ ଶତ ଚେଷ୍ଟା ସତ୍ତ୍ୱେ ୭ ବର୍ଷର ହେବା ବେଳକୁ ଭକ୍ତିଙ୍କ ଡାହାଣ ଆଖିଟି କର୍କଟରେ ଆକ୍ରାନ୍ତ ହେଲା । ୯ ବର୍ଷ ହେଲାବେଳକୁ ତାଙ୍କର ଏହି ଆଖିଟି ମଧ୍ୟ ନଷ୍ଟ ହୋଇଯାଇଥିଲା । ଭକ୍ତିଙ୍କ ମା' ସୁଷମା ଯେପରି ନିର୍ବାକ ହୋଇଯାଇଥିଲା । ଏତେ ଛୋଟ ଝିଅର ଅନ୍ଧକାରମୟ ଭବିଷ୍ୟତକୁ ନେଇ ସେ ସବୁବେଳେ ଚିନ୍ତାଗ୍ରସ୍ତ  ରହୁଥିଲେ । ଏଭଳି ପରିସ୍ଥିତିରେ ଭକ୍ତିଙ୍କ ଜେଜେ ମା’ ହିଁ ସମସ୍ତଙ୍କ ମନୋବଳ ବଢାଇଥିଲେ ।  ଏହି ସବୁ ଚିକିତ୍ସା ଭିତରେ ଭକ୍ତିଙ୍କ ପାଠପଢ଼ା ମଧ୍ୟ ବହୁତ କ୍ଷତିଗ୍ରସ୍ତ ହୋଇଥିଲା ।

ଘରଲୋକ ଓ  ଶିକ୍ଷୟିତ୍ରୀଙ୍କ ପ୍ରୋତ୍ସାହନ

ଆଉ ବିଳମ୍ବ ନ କରି ପିତା ରମେଶ ସ୍ଥାନୀୟ ଦୃଷ୍ଟିହୀନ ବିଦ୍ୟାଳୟରେ ଝିଅର ନାମ ଲେଖାଇଦେଲେ ସେଠାକାର ଜନୈକ ଦୃଷ୍ଟିହୀନ ଶିକ୍ଷୟିତ୍ରୀ ଜିଜ୍ଞାସା କୁବେଡ଼ ହିଁ। ଭକ୍ତିଙ୍କ ଶକ୍ତି ହୋଇଥିଲେ । ଶିକ୍ଷୟିତ୍ରୀ ଜଣକ ଜାଣିପାରିଥିଲେ ଯେ ଭକ୍ତି  ଜଣେ ବିଚକ୍ଷଣ ବୁଦ୍ଧି ସମ୍ପନ୍ନ ବାଳିକା  । ସାମାନ୍ୟ ଧ୍ୟାନ ଦେଲେ ଭକ୍ତି ପାଠ ପଢାରେ ବେଶ୍ ଉନ୍ନତି କରୁଥିବାର ଶିକ୍ଷୟିତ୍ରୀ ଲକ୍ଷ୍ୟ କରିଥିଲେ । ସେ ଏହା ପରଠାରୁ ଭକ୍ତିଙ୍କୁ ଉତ୍ସାହିତ କରିବାକୁ ଲାଗିଲେ । ବଡ଼ ଭଉଣୀଙ୍କ ସହାୟତାରେ ଭକ୍ତି କମ୍ପ୍ୟୁଟର ଚାଳନା ଶିଖିବା ସହ ନିଜେ ଇ-ମେଲ ପ୍ରଦାନ କଲେ । ଏକରକମା ସିଦ୍ଧହସ୍ତ ହୋଇଗଲେ ଭକ୍ତି । ଦଶମ ଶ୍ରେଣୀ ପରୀକ୍ଷାରେ ଭକ୍ତି ୯୪ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହେଲେ । ଏ ସଫଳତାରେ ପରିବାର ଲୋକଙ୍କ ଠାରୁ ଆରମ୍ଭ କରି ଭକ୍ତି ନିଜେ ମଧ୍ୟ ଆଶ୍ଚର୍ଯ୍ୟ ହୋଇଥିଲେ । ମନୋବଳ ତାଙ୍କର ଆହୁରି ସୁଦୃଢ଼ ହେଲା । ନିଜ ରାଜ୍ୟରେ ସେ ଦିବ୍ୟାଙ୍ଗଙ୍କ ମଧ୍ୟରେ ପ୍ରଥମ ସ୍ନାନ ଅଧିକାର କରିଥିଲେ । ଏହା ପରେ ଯୁକ୍ତ ଦୁଇରେ ୮୮ ପ୍ରତିଶତ ନମ୍ବର ରଖିବା ସହ ସମଗ୍ର ରାଜ୍ୟରେ ଦ୍ଵିତୀୟ ସ୍ନାନ ଅଧିକାର କଲେ । ଏଥରକ ସ୍ନାତକରେ ସ୍ଵର୍ଣ୍ଣ ପଦକ ବିଜୟିନୀ ହୋଇଛନ୍ତି ଭକ୍ତି । ନିକଟରେ ଏକ ସାକ୍ଷାତକାରରେ ଭକ୍ତି କହିଥିଲେ ଯେ ଏସବୁ ସଫଳତା ପାଇବା ଏତେ ସହଜ ନଥିଲା । ଏହା ସହ ଜନ୍ମରୁ ଦୃଷ୍ଟିହୀନ ହେବାବେଳେ ମୋ ପରିସ୍ଥିତି ସମ୍ପୁର୍ଣ୍ଣ ଅଲଗା ଥିଲା । ଏହି ସୁନ୍ଦର ପୃଥିବୀକୁ ଦେଖିବାର ସୌଭାଗ୍ୟ ମୋତେ କିଛି ବର୍ଷ ମିଳିଥିଲା, ଏହା ପରେ ଅନ୍ଧକାର ମୋ ଉପରେ ରାଜୁତି କଲା ଭଳି ଲାଗିଥିଲା । ଏତେ ସବୁ ଭିତରେ ବି ଜେଜେ ମା', 'ବାପା, ମା', ବଡ଼ ଭଉଣୀ ମୋ ନିକଟରେ ଢାଳ ପରି ଛିଡ଼ା ହୋଇଥିଲେ ।

ଆଧାର – ରାଧାନାଥ ପରିଡା