ରକ୍ ବ୍ୟାଣ୍ଡ୍ କଥା କହିଲେ ଯୁବକ ଯୁବତୀମାନଙ୍କ ମଧ୍ୟରେ ରୋମାଂଚ ଭରିଯାଏ । ଏହା ଯେ କେବଳ ମନୋରଂଜନର ମାଧ୍ୟମ ବୋଲି ଅନେକ ଲୋକ ଭାବନ୍ତି । କିନ୍ତୁ ଏହା ଦ୍ୱାରା ସମାଜକୁ ବିଭିନ୍ନ ପ୍ରସଙ୍ଗରେ ସଚେତନତା ମଧ୍ୟ ସୃଷ୍ଟି କରାଯାଇପାରିବ । ବିଶେଷ କରି ସଂଗୀତ ଦ୍ୱାରା ସଚେତନତା କରାଇଲେ ଲୋକଙ୍କ ଉପରେ ଏହାର ଗଭୀର ପ୍ରଭାବ ମଧ୍ୟ ପଡେ । ରକ୍ ବ୍ୟାଣ୍ଡ୍ ଜରିଆରେ କନ୍ୟାଭ୍ରୁଣ ରୋକିବା ପାଇଁ କଟକର ଏକ ରକ୍ ବ୍ୟାଣ୍ଡ୍ ଗ୍ରୁପ ପ୍ରୟାସ ଜାରି ରଖିଛି । ଦେଶର ବିଭିନ୍ନ ସହରରେ ଏମାନେ ଶୋ କରିବା ପୂର୍ବରୁ କନ୍ୟାଭ୍ରୁଣ ହତ୍ୟାକୁ ରୋକିବା ସମ୍ପର୍କିତ ଗୀତରୁ ଆରମ୍ଭ ହୋଇଥାଏ କାର୍ଯ୍ୟକ୍ରମ । ଏହି ପ୍ରସଙ୍ଗ ଉଠାଇ ସେମାନେ ଏବେ ଚର୍ଚ୍ଚାର ବିଷୟ ପାଲଟିଛନ୍ତି ।
ଏଭଳି ଅଭିଯାନ ଆରମ୍ଭ କରିଥିବା କଟକର ଏହି ଟ୍ରୁପ୍ ହେଉଛି ବିଘ୍ନାଜ୍ ବ୍ୟାଣ୍ଡ୍ ଗ୍ରୁପ୍ । ୨୦୦୭ରୁ ଏହି ଗ୍ରୁପ୍ ରକ୍ ବ୍ୟାଣ୍ଡ ସଂଗୀତ ପରିବେଷଣ କରୁଛି । ତେବେ ୨୦୧୬ରୁ ଏମାନେ ଏକ ଅଭିନବ ପ୍ରୟାସ ଭାବେ କନ୍ୟା ଭ୍ରୁଣ ହତ୍ୟା ରୋକିବା ଲାଗି ଏକ ପଦକ୍ଷେପ ନେଇଥିଲେ । କନ୍ୟାଭ୍ରୁଣ ସୁରକ୍ଷା ଆହ୍ୱାନ ଦେଇ ଏହି ଟ୍ରୁପ୍ ଏକ ଗୀତ ପ୍ରସ୍ତୁତ କରିଛି | ଏହାକୁ ହିନ୍ଦୀ, ତେଲୁଗୁ, ଓଡିଆ ଓ ଇଂରାଜୀ ଭାଷାରେ କରାଯାଇଛି । ସେମାନେ ଯେ କୌଣସି ସ୍ଥାନରେ ସଂଗୀତ ପରିବେଷଣ କରିବା ପୂର୍ବରୁ ଏହି ଗୀତଟିକୁ ପ୍ରଥମେ ଗାଇଥାନ୍ତି । ଲୋକେ ଏହାକୁ ପସନ୍ଦ ମଧ୍ୟ କରିଛନ୍ତି । ଦିଲ୍ଲୀ, କୋଲକାତା, ଚେନ୍ନାଇ, ବିଜୟୱାଡା, ବିଶାଖାପାଟଣା, ହାଇଦ୍ରାବାଦ, ଗ୍ୱାଲିଅର ଓ ପଣ୍ଡିଚେରୀ ଆଦି ସହରରେ ଏହି ବ୍ୟାଣ୍ଡ୍ ଗ୍ରୁପ୍ ଏହି ସଚେତନତାମୂଳକ ଗୀତକୁ ପରିବେଷଣ କରି ସାରିଛି ।
ବ୍ୟାଣ୍ଡ୍ ର ମୁଖ୍ୟ ତଥା କଣ୍ଠଶିଳ୍ପୀ ଦୁର୍ଗା କହନ୍ତି,ରକ୍ ବ୍ୟାଣ୍ଡ୍ ଏଭଳି ସଚେତନତାମୂଳକ ଗୀତରୁ କାର୍ଯ୍ୟକ୍ରମ ଆରମ୍ଭ କରିବା ପୂର୍ବରୁ କେଉଁଠି ଦେଖିନଥିଲି । ତେବେ ଆମ ମନରେ ମଧ୍ୟ ଡର ଥିଲା ଯେ ଯୁବ ସମାଜ ଏହାକୁ କିପରି ଗ୍ରହଣ କରିବ । କିନ୍ତୁ ବିଭିନ୍ନ ଯାଗାରେ ଆମକୁ ଭଲ ରେସପନ୍ସ ଆସିଛି । କେତେକ ସ୍ୱେଚ୍ଛାସେବୀ ସଂଗଠନ ପାଇଁ ମଧ୍ୟ ଆମେ ଏଭଳି ଗୀତ ପରିବେଷଣ କରୁଛୁ ।
ଏଇ ଜାନୁୟାରୀ ପ୍ରଥମ ସପ୍ତାହରେ ହାଇଦ୍ରାବାଦରେ କନ୍ୟାଭ୍ରୁଣ ହତ୍ୟା ରୋକିବା ଉଦ୍ଦେଶ୍ୟରେ ତେଲୁଗୁ ଗୀତ ‘ଡୋଲି-ଅର୍ଗୁ’ ରିଲିଜ୍ କରାଯାଇଥିଲା । ହିନ୍ଦୀ ଭର୍ସନ୍ ମାର୍ଚ୍ଚ ମାସରେ ଦିଲ୍ଲୀରେ ରିଲିଜ୍ ହେବ । ଓଡିଆ ଭର୍ସନକୁ କଟକରେ ରିଲିଜ୍ କରାଯିବ ।
ଏବେ ବି ଅନେକ ଲୋକଙ୍କ ଭାବନା ଯେ ଝିଅଟିଏ ପରିବାର ପାଇଁ ବୋଝ । ତେଣୁ ସେମାନେ କନ୍ୟା ଭ୍ରୁଣ ହତ୍ୟା କରିବାକୁ ପଛାନ୍ତି ନାହିଁ । ଏଭଳି ଅପରାଧକୁ ରୋକିବା ପାଇଁ ନିୟମ ଥିଲେ ମଧ୍ୟ ଲୋକଙ୍କ ମଧ୍ୟରେ ସଚେତନତା ଆସିନଥିବାରୁ ଏହା ଫଳପ୍ରଦ ହୋଇପାରୁନାହିଁ । ତେବେ ବିଭିନ୍ନ ମାଧ୍ୟମରେ ଲୋକଙ୍କୁ ସଚେତନ କରାଯାଇପାରିଲେ, ଏହା ନିଶ୍ଚିତ ଭାବେ କମିବ । ବିଘ୍ନାଜ୍ ବ୍ୟାଣ୍ଡର ଏହି ପଦକ୍ଷେପ ନିଶ୍ଚୟ ସ୍ୱାଗତଯୋଗ୍ୟ । ଭୁବନେଶ୍ୱର-କଟକ ଟ୍ୱିନ୍ ସିଟିର ବିଭିନ୍ନ ବସ୍ତିରେ ମଧ୍ୟ ଏହି ବ୍ୟାଣ୍ଡ କନ୍ୟା ଭ୍ରୁଣ ହତ୍ୟା ରୋକିବା ରକ୍ ବ୍ୟାଣ୍ଡ୍ ସୋ କରିବାକୁ ଯୋଜନା କରିଛି । ଏହା ବେଟି ବଚାଅ, ବେଟି ପଢାଓ ଆହ୍ୱାନକୁ ଆହୁରି ଶକ୍ତିଶାଳୀ କରିବ ବୋଲି ଆଶା କରାଯାଏ ।
ଆଧାର - Akhand social worker, freelance journalist
Last Modified : 1/26/2020