ସ୍ୱଚ୍ଛତା ଅଭିଯାନ ସହ ଗଛ ଲଗାଇବାକୁ କରିଛନ୍ତି ଜୀବନର ବ୍ରତ

ସମାଜସେବା ଅଭିଯାନ

ଇଛା ଓ ଆନ୍ତରିକତା ଥିଲେ ଜଣେ ନିଜ କାମ ସହ ସମାଜ ପାଇଁ ମଧ୍ୟ ଅନେକ କିଛି କରିପାରିବ । ସମାଜସେବା ପାଇଁ ଯେ ଅଧିକ  ସମୟ ଦେବାକୁ ପଡିବ, ସେମିତି କିଛି ନାହିଁ । ଆପଣ ନିଜ ଅବସର ମସୟରେ ବି ସମାଜସେବା କରିପାରିବେ । ପୁରୀ ଜିଲ୍ଲା ଅସ୍ତରଙ୍ଗ ଅଂଚଳର ପ୍ରହଲ୍ଲାଦ ସ୍ୱାଇଁ ଓରଫ୍ ବଂଶୀ ଭାଇନାଙ୍କ କଥା ଦେଖନ୍ତୁ । ନିଜେ ସେ ଔଷଧ ଦୋକାନ କରିଛନ୍ତି । କିନ୍ତୁ ସମାଜସେବା ପାଇଁ ଅନେକ କାମ କରି ନିଜ ଅଂଚଳରେ ଏକ ପରିଚୟ ସୃଷ୍ଟି କରିପାରିଛନ୍ତି ।

ପ୍ରହଲ୍ଲାଦଙ୍କ କାହାଣୀ

ପ୍ରହଲ୍ଲାଦଙ୍କ ଘର ଅସ୍ତରଙ୍ଗର ବରାଂଗ ଗାଁରେ । ଅସ୍ତରଙ୍ଗ ବଜାରରେ ତାଙ୍କର ଗୋଟିଏ ମେଡିସିନ୍ ଷ୍ଟୋର ରହିଛି । ପିଲାଦିନରୁ ବାପାମାଙ୍କ ପ୍ରେରଣାରେ ହିଁ ସମାଜସେବାକୁ ସେ ଆପଣେଇ ନେଇଛନ୍ତି । ୧୯୯୭ ମସିହାରେ ଭାରତ ସରକାରଙ୍କ ସାକ୍ଷରତା କାର୍ଯ୍ୟକ୍ରମ ଅଭିଯାନରେ ସେ ସାମିଲ ହୋଇଥିଲେ । ଆଳସାହି ପଂଚାୟତର ବିଭିନ୍ନ ଗ୍ରାମରେ ଏହି ଅଭିଯାନ ମାଧ୍ୟମରେ ସେ ଅନେକ ଲୋକଙ୍କୁ ସାକ୍ଷର କରାଇପାରିଥିଲେ । ବନ୍ୟାବାତ୍ୟା ସମୟରେ ସେ ଲୋକମାନଙ୍କୁ ସବୁ ପ୍ରକାର ସହଯୋଗ ଯୋଗାଇ ଦେଇଥାନ୍ତି । ୧୯୯୯ ମହାବାତ୍ୟା ସମୟରେ ଅସ୍ତରଙ୍ଗ ଅଂଚଳରେ ବ୍ୟପାକ କ୍ଷୟକ୍ଷତି ହୋଇଥିଲା । ଏହି ସମୟରେ ରିଲିଫ୍ ବଣ୍ଟନ ଓ ଥଇଥାନ କାମ ପାଇଁ ସେ ଦିନରାତି ଲଗାଇଦେଇଥିଲେ । ଗାଁ ରାସ୍ତା ଓ ପୋଖରୀ ସଫେଇରେ ସହଯୋଗ, ମାଗଣା ସ୍ୱାସ୍ଥ୍ୟ ଚିକିତ୍ସା ଶିବିର, ଖରାଦିନେ ଜଳଛତ୍ର ଖୋଲିବା ଆଦି ସବୁ କାମକୁ ସେ ଆଗକୁ ବଢାଇ ନିଅନ୍ତି । ଶ୍ରଦ୍ଧାରେ ଲୋକେ ତାଙ୍କୁ ବଇଁଶୀ ଭାଇନା ଡାକନ୍ତି ।

ତାଙ୍କର ଏହି କାର୍ଯ୍ୟକ୍ରମ ସମ୍ପର୍କରେ ଜଣେ ସ୍ଥାନୀୟ ବାସିନ୍ଦା ଶରତ କୁମାର ପରିଡା କୁହନ୍ତି, ବଇଁଶୀ ଭାଇନା ଜଣେ ପ୍ରକୃତିପ୍ରେମୀ ମଧ୍ୟ । ସେ ଶହ ଶହ ଗଛ ଲଗାଇଥିବା ଆମେ ଦେଖୁଛୁ । ଆଳଂଗପୁର ଠାରୁ ବଂରାଗ ପର୍ଯ୍ୟନ୍ତ ରାସ୍ତା କଡରେ ଓ ହାଇସ୍କୁଲ କ୍ୟାମ୍ପସ୍ ରେ ସେ ବହୁ ପ୍ରକାର ଗଛ ଲଗାଇଛନ୍ତି । ବସ୍ତଡିହ ଗାଁର କାଶୀ ବିଶ୍ୱନାଥ ମନ୍ଦିରରେ ନଡିଆ ଆଦି ଗଛ ଲଗାଇ ସେଠାରରେ ସବୁଜିମା ସୃଷ୍ଟି କରିପାରିଛନ୍ତି ।

ସ୍ୱଚ୍ଛତା ଅଭିଯାନ

ପ୍ରଧାନମନ୍ତ୍ରୀଙ୍କ ଆହ୍ୱାନରେ ସେ ଅସ୍ତରଙ୍ଗର ବିଭିନ୍ନ ଅଂଚଳରେ ସ୍ୱଚ୍ଛତା ଅଭିଯାନ ଚଳାଇଛନ୍ତି । ଅସ୍ତରଙ୍ଗ ମହାବୀର ମନ୍ଦିର ଠାରୁ ତାରିଣୀ ମନ୍ଦିର ଓ ଥାନା ପର୍ଯ୍ୟନ୍ତ ରାସ୍ତାକୁ ସଂପୂର୍ଣ ଭାବେ ସଫା କରି ପରିସ୍କାର ପରିବେଶ ସୃଷ୍ଟି କରିପାରିଛନ୍ତି ସେ ।

ଅସ୍ତରଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆସୁଥିବା ନିରାଶ୍ରୟ ରୋଗୀଙ୍କୁ ମଧ୍ୟ ବଂଶୀ ଭାଇନା ସହଯୋଗ କରନ୍ତି । ଏଭଳିକି ଗରିବ ରୋଗୀଙ୍କୁ ମାଗଣାରେ ଔଷଧ ଦେବା ସହିତ ଅନ୍ୟାନ୍ୟ ସାହାଯ୍ୟ ସହଯୋଗ କରନ୍ତି । ତେବେ ଗଛ ଲଗାଇ ପରିବେଶକୁ ସବୁଜିମା କରିବା ତାଙ୍କ ଜୀବନର ବ୍ରତ ପାଲଟିଯାଇଛି । ଅନେକ ଅନୁଷ୍ଠାନ ପରିସରରେ ସେ ଗଛ ଲଗାଇଛନ୍ତି । ମହାତ୍ମାଗାନ୍ଧୀ ବୈଷୟିକ ବିଦ୍ୟାଳୟରେ ୫୦ରୁ ଅଧିକ ନଡିଆ ଓ ନାନାଦି ଗଛ ଲଗାଇଛନ୍ତି । ଅସ୍ତରଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ମଧ୍ୟ ସେ ବୃକ୍ଷରୋପଣ କରିଛନ୍ତି । ଏଥିପାଇଁ ତାଙ୍କୁ ଗତ ଜାନୁୟାରୀ ୨୬ ତାରିଖରେ ରୋଗୀ କଲ୍ୟାଣ ସମିତି ପକ୍ଷରୁ ପୁରସ୍କୃତ କରାଯାଇଛି ।

ସେ କହନ୍ତି,  ବାପା ମା ମୋତେ ସବୁବେଳେ ଏହି କାମ ପାଇଁ ପ୍ରେରଣା ଦେଇ ଆସିଛନ୍ତି । ମୁଁ ଜଣେ ସାଧାରଣ ନାଗରିକ । ତେଣୁ ଦେଶ ପାଇଁ ଯେତିକି କରିବା କଥା କରୁଛି । ତା ସହିତ ମୁଁ ମୋର ମେଡିସିନ୍ ଷ୍ଟୋରଟିକୁ ପରିବାର ପ୍ରତିପୋଷଣ ପାଇଁ ଚଳାଉଛି । ଏସବୁ ଠିକ୍ ଠାକ୍ ଚାଲିଛି । ମୁଁ ଅବସର ସମୟରେ ହିଁ ଗଛ ଲଗାଏ ଓ ପରିବେଶ ପରିସ୍କାର କରେ । ଏଭଳି କାମ କେଉଁଠି ହେଉଥିଲେ ମୁଁ ଆପେ ଆପେ ସେମାନଙ୍କ ସହ ଯୋଗ ଦିଏ ।

ପରିବାର ଲୋକେ ଓ ତାଙ୍କ ଧର୍ମପତ୍ନୀ ମଧ୍ୟ ପ୍ରହଲ୍ଲାଦଙ୍କୁ ଏହି କାମରେ ସହଯୋଗ କରୁଛନ୍ତି । ତାଙ୍କ ସହଧର୍ମିଣୀ କୁହନ୍ତି, ମୁଁ ଖୁସୀ ହୁଏ ତାଙ୍କର ସବୁ କାମ ଦେଖି । ନିଜ କାମ ସହ ସମାଜ ପାଇଁ ମଧ୍ୟ କିଛି କରିବାର ଅଛି । ଘରକୋଣ ରହି ମଧ୍ୟ ତାଙ୍କୁ ଏଥିପାଇଁ ସବୁ ପ୍ରକାର ସାହାଯ୍ୟ କରୁଛି । ତାଙ୍କୁ ଯେଉଁ ଦିନ ପୁରସ୍କାର ମିଳିଲା, ଆମେ ସମସ୍ତେ ଭାରି ଖୁସୀ ହୋଇଥିଲୁ ।

ପରିବେଶପ୍ରେମୀ

ଆସନ୍ତା ଜୁଲାଇ ମାସରେ ବନ ମହୋତ୍ସବ ସପ୍ତାହ ପାଳିତ ହେବ । ଏହି ସମୟରେ ବହୁ ଗାଁରେ ନଡିଆ, ପଣସ, ଆମ୍ବ ଆଦି ବୃକ୍ଷରୋପଣ ପାଇଁ ପ୍ରହଲ୍ଲାଦ ଯୋଜନା କରିଛନ୍ତି । ବିଭିନ୍ନ ପର୍ବପର୍ବାଣୀରେ ବିଭିନ୍ନ ଧାର୍ମିକ ପୀଠର ପରିବେଶକୁ ପରିସ୍କାର କରିବା ପାଇଁ ମଧ୍ୟ ସେ ଅଭିଯାନ ଆରମ୍ଭ କରିବେ ବୋଲି କହିଛନ୍ତି ।

ପ୍ରକୃତରେ ବଇଁଶୀ ଭାଇନାଙ୍କ ମହାନ ଭାବନା ଓ ସେବା କରିବାର ଆନ୍ତରିକତା ଯୋଗୁଁ ହିଁ ସେ ଆଜି ଅସ୍ତରଙ୍ଗର ପରିବେଶପ୍ରେମୀ ଭାବେ ପରିଚିତ ହୋଇପାରିଛନ୍ତି । ତାଙ୍କର ଏହି ଉଦ୍ୟମରେ ଅନେକ ଯୁବକ ମଧ୍ୟ ସାମିଲ ହୋଇଛନ୍ତି । ଆଗକୁ ତାଙ୍କ ଅଭିଯାନ ଆହୁରି ସଫଳ ହେଉ ବୋଲି ୟୋର ଷ୍ଟୋରୀ ପକ୍ଷରୁ ଶୁଭକାମନା ।

ଆଧାର-Team Odia writer