କଥାରେ ଅଛି – ଗାଈ ମୁହଁରେ ଦେଲେ ଘାସ, କ୍ଷୀର ଦୁହିଁବ ବାରମାସ । ତୀରଣ ସୁନ୍ଦର ଗାଈ । ଗାଈ ଗୋରୁ ହେଉଛନ୍ତି ଗୃହପାଳିତ ତୃଣଭୋଜୀ ପ୍ରାଣୀ । ସେମାନଙ୍କ ମୁଖ୍ୟ ଖାଦ୍ୟ ହେଲା ସବୁଜ ଘାସ ।ଆଗରେ ଆମ ଲୋକମାନେ ଦେଶୀଗୋରୁଙ୍କୁ ଚାରଣ ଭୂମିରେ ଚରିବା ପାଇଁ ଛାଡି ଦେଉଥିଲେ । ସେଠାରେ ମିଳିଥିବା ତନ୍ତୁବହୁଳ ଘାସ ଖାଇ ସୀମିତ ପରିବାର ମଧ୍ୟରେ ଯେତିକି ଗାଈ କ୍ଷୀର ଦେଉଥିଲେ, ତାହା ସେମାନଙ୍କ ପାଇଁ ଯଥେଷ୍ଟ ଥିଲା । କ୍ରମଶଃ ଜଣସଂଖ୍ୟା ବୃଦ୍ଧି ସହିତ କ୍ଷୀରର ଆବଶ୍ୟକତା ବୃଦ୍ଧି ଯୋଗୁଁ କ୍ଷୀରର ଚାହିଦା ମେଣ୍ଟାଇବା ପାଇଁ କୃତ୍ରିମ ପ୍ରଜନନ ସେବା ସରକାର ଆରମ୍ଭ କଲେ । ଯାହା ଫଳରେ ଆମ ରାଜ୍ୟର ପ୍ରତ୍ୟେକ ଗାଁଗହଳିରେ ଆଜି ଉନ୍ନତ ଶଙ୍କର ଗାଈ ଦେଖିବାକୁ ମିଳୁଛନ୍ତି । ତେଣୁ ସେମାନଙ୍କର ଉତ୍ତମ ସ୍ୱାସ୍ଥ୍ୟ ରକ୍ଷା ସହ ପ୍ରଜନନ ଦକ୍ଷତା, କ୍ଷୀର ଉତ୍ପାଦନ ଓ ରୋଗ ପ୍ରତିରୋଧକ ଶକ୍ତି ବୃଦ୍ଧି ଲାଗି ସବୁଜ ସରକାର ଉନ୍ନତ ଗୋପାଳନ ଓ ତାର ସବୁଜ ଘାସର ଚାହିଦା ପୂରଣ ପାଇଁ ଘରବାଡି ବା ଚାଷ ଜମିରେ ଅଧିକ ଅମଳକ୍ଷମ ସ୍ଵତନ୍ତ୍ର ଘାସ ନିମନ୍ତେ ଦୁଗ୍ଧ ଚାଷୀମାନଙ୍କୁ ସଦାସର୍ବଦା ପ୍ରୋତ୍ସାହନ ଯୋଗାଇ ଆସୁଛନ୍ତି । ଏହା ସବୁଜ ଗୋଖାଦ୍ୟ ଫସଲ ବା ଘାସରେ ପ୍ରଚୁର ପରିମାଣର ପୃଷ୍ଟିସାର ଯୁକ୍ତ ଖାଦ୍ୟ ସହିତ ଭିଟାମିନ “କ “ ପ୍ରସ୍ତୃତ କରି ବିଟାକାରୋଟିନ, ଧାତବଲବଣ, ଯଥା – କ୍ୟାଲସିୟମ , ଫସଫରସ, ମାଗ୍ନେସିୟମ , ଲୌହ , କପର , କୋବାଲଟ ଆଦି ନିହିତ ଥାଏ । ଏହି ସବୁଜ ଘାସ ଗାଈ ଖାଇବା ଦ୍ଵାରା ସେମାନଙ୍କ ଶରୀର ଚିକ୍କଣ ଦିଶେ । ଗାଈବା ଛଡାଙ୍କର ଗରମ ଠିକ ସମୟରେ ଆସି ଗର୍ଭବତୀ ହୋଇଥାନ୍ତି । ବର୍ଷକୁ ଗୋଟିଏ ଲେଖାଏଁ ବାଛୁରି ଦେବାକୁ ସକ୍ଷମ ହୋଇଥାନ୍ତି ।
ବିଭିନ୍ନ ଋତୁ, ଜଳବାୟୁ , ମୃତ୍ତିକା, କିସମ ଜମିର ଅବସ୍ଥିତି ପାଣିର ସୁବିଧା ଆଦି ନେଇ ଭିନ୍ନ ଭିନ୍ନ ସବୁଜ ଖାଦ୍ୟ ଫସଲ କରାଯାଇଥାଏ । ସେଗୁଡିକ ହେଲା – ଋତୁକାଳୀନ ଗୋଖାଦ୍ୟ ଫସଲ, ସବୁଦିନିଆ ଗୋଖାଦ୍ୟ ଫସଲ ସବୁଜ ଗୋଖାଦ୍ୟ ଗଛ ।
ସାଧାରଣତଃ ବର୍ଷା ଓ ଶୀତକାଳୀନ ସବୁଜ ଗୋଖାଦ୍ୟ ଫସଲକୁ ଋତୁକାଳୀନ ଗୋଖାଦ୍ୟ ଫସଲ ଭାବେ ଗ୍ରହଣ କରାଯାଏ । ବର୍ଷାଦିନେ ବା ଖରିଫ ଋତୁରେ ସବୁଜ ଗୋଖାଦ୍ୟ ଫସଲ କରାଯାଉଥିବା ନାମଗୁଡିକ ହେଲା – ଶସ୍ୟଜାତୀୟ, ମକା, ବାଜରା, ବରଗୁଡି, ଡଙ୍ଗରାଣୀ, ଗୁଆଁର ଇତ୍ୟାଦି ।
ସବୁଦିନିଆ ଗୋଖାଦ୍ୟ ଫସଲ
ଯେଉଁ ସବୁଜ ଗୋଖାଦ୍ୟ ଫସଲକୁ ବର୍ଷସାରା ଅମଳ କରି ଗୋରୁଙ୍କ ଖାଇବାକୁ ଦିଆଯାଏ । ତାହାକୁ ସବୁଦିନିଆ ଗୋଖାଦ୍ୟ ଫସଲ ବୋଲି କୁହାଯାଏ । ସାଧାରଣତଃ ଏହା ଦୁଇପ୍ରକାରର –
ଶସ୍ୟ ଜାତୀୟ : ସଙ୍କର ହାତିଆ, ଗିନି,ପାରା, ରୋଡଶ, ମୋଲାସେସ , ହିମିଲିକୋଲା ।
ଛୁଇଁ ଜାତୀୟ ସବୁଦିନିଆ ଘାସ : ଷ୍ଟାଲଲୋ, ସେଣ୍ଟ୍ରୋ , ସିରାଟ୍ରୋ ।
ସବୁଜ ଗୋଖାଦ୍ୟ ଗଛ
ସୁବାବୁଲ, ଅଗସ୍ତି, ବାର୍ଡ, କଞ୍ଚନ , ଶିଶୁ , ଅର୍ଜୁନ ଇତ୍ୟାଦି । ବର୍ଷାଦିନ ଆରମ୍ଭରେ ଗାଈଫାର୍ମ ବା ଗୁହାଳ ଛେଳିଘର ଏବଂ କୁକୁଡା ଘର ସହିତ ରହୁଥିବା ବାସସ୍ଥାନ ଚତୁଃପାର୍ଶ୍ଵରେ ଗଛ ଲଗାଇଲେ ଏହା ଆଗାମୀ ଦିନରେ ସବୁଜ ପତ୍ର ପ୍ରଦାନ , ଛାଇ, ଥଣ୍ଡା ପରିବେଶ ସୃଷ୍ଟି କରିବା ସହ ପ୍ରାଣୀମାନଙ୍କୁ ଅଂଶୁଘାତରୁ ମୁକ୍ତ ରଖିପାରିବ ।
ଚାଷୋପଯୋଗୀ ମୃତ୍ତିକା ଜଳବାୟୁ
ହାତିଆ , ଘାସ , ଗିନି, ମକା , ବାଜରା , ଜୁଆର ଆଦି ଉଚ୍ଚ ନିଗିଡା ବାଲିଆ ଦୋରସା ମାଟିରେ ବେସ ଭଲ ହୁଏ । ପାଣି ଜମିଥିବା ଖାଲୁଆ , ଓଦା ଓ ସନ୍ତସନ୍ତିଆ ସମତଳ ଅଞ୍ଚଳ ପାରା ଘାସ ଚାଷ ପାଇଁ ଉପଯୁକ୍ତ । ବାଲିଆ ଦୋରସା ମାଟିରେ ବରଗୁଡି , ଗୁଆଁର , ଦୀନନାଥ ପ୍ରଭୁତି ଘାସ ଚାଷ କଲେ ସବୁଠୁ ଭଲ । ଲୁଣା ମାଟି ଅଞ୍ଚଳରେ ବାଜରା , ରୋଡଶ , ଜୁଆରମ ଆଦି ଘାସ ଚାଷ କରିବା ଆବଶ୍ୟକ । ଜଳଛାୟା ଅଞ୍ଚଳରେ ଷ୍ଟାଇଲୋ ଚାଷ କରିବା ଆବଶ୍ୟକ । ଉଷ୍ଣ ଓ ଆର୍ଦ୍ର ଜଳବାୟୁ ସବୁଦିନିଆ ଓ କେତେକ ଋତୁକାଳୀନ ଘାସ ଚାଷ ପାଇଁ ଅନୁକୂଳ । ଜଳବାୟୁ ମାଟିର ଉଷ୍ଣତା ଓ ଦୀନର ବ୍ୟବଧାନ ସମୟ ଦୃଷ୍ଟିରୁ ବର୍ଷା ଓ ଖରାଦିନେ ସବୁଦିନିଆ ଘାସ ଚାଷରେ ଅଧିକ ଅମଳ ମିଳେ ।
ପ୍ରତି ଏକର ପିଛା ଜମିରେ ହଟିଆ ଘାସ ଚାଷ ପାଇଁ 5000 ମୂଳ ବା କାଣ୍ଡ ଆବଶ୍ୟକ । ସେହିପରି ମକା ଚାଷ ପାଇଁ 20 କେଜି , ଏମ.ପି ଚେର ବା ଜୁଆର -12 ରୁ 15 କେଜି , ବାଜରା -5 ରୁ 10 କେଜି , ବରଗୁଡି -12 ରୁ 16 କେଜି , ଗୁଆଁର -16 କେଜି ଦରକାର । ସବୁଦିନିଆ ଘାସ ତଥା ସଙ୍କର ହାତିଆ ଓ ଗିନି ଘାସ ଚାରାଗୁଡିକ ଧାଡିକୁ ଧାଡି ତିନି ଫୁଟ ଓ ଗଛକୁ ଗଛ 2.5 ବ୍ୟବଧାନରେ ଲଗାନ୍ତୁ । ମକା , ବାଜରା , ବରଗୁଡି , ଗୁଆଁର ବିହନକୁ କାଟି ବୁଣିବା ଅପେକ୍ଷା ଧାଡି କରି ବୁଣିଲେ ଅଧିକ ଫସଲ ଆମଦାନି ହୋଇଥାଏ । ସଙ୍କର ହତିଆ ଗିନି ଓ ପାରା ଘାସର ପ୍ରତି ଖଣ୍ଡରେ 2-3 ଗଣ୍ଡି ଥିଲେ ଭଲ । ପ୍ରତି ମନ୍ଦାରେ 2 ଖଣ୍ଡ ଚାରା ଲଗାଇଲେ ପ୍ରତି ମନ୍ଦାରୁ ଘାସ ବଞ୍ଚିବା ଆସା ଠିକ ରହେ । ଷ୍ଟାଇଲୋ ମଞ୍ଜିର ଉପର ଚୋପା ଟାଣ ଥିବାରୁ ଏଥିରେ ଭଲ ଭାବେ ଗଜା ହେବା ପାଇଁ ମଞ୍ଜିକୁ ପାଞ୍ଚ ମିନିଟ ଉଷୁମ ପାଣିରେ ରଖିବା ପରେ ରାତି ସାରା ଥଣ୍ଡା ପାଣିରେ ଭିଜାଇ ରଖନ୍ତୁ । ସକାଳୁ ମଞ୍ଜିକୁ ଛାଣି କିଛି ସମୟ ଛାଇରେ ରଖିବା ପରେ ମଞ୍ଜିକୁ ଶୁଖିଲା ବାଲି ବା ଗୁଣ୍ଡ ମାଟି ସହ ମିଶାଇ ଜମିରେ ଧାଡିକୁ ଧାଡି 30 ସେମି ବ୍ୟବଧାନରେ ବୁଣନ୍ତୁ । ମେ, ଜୁନ ଅତି ବେଶୀରେ ଜୁଲାଇ ମାସ ସବୁଦିନିଆ ଘାସ ଚାଷ ପାଇଁ ପ୍ରକୃଷ୍ଟ ସମୟ ।
ଅମଳ ସମୟ
ସଙ୍କର ହାତିଆ , ଗିନି ଓ ପାରା ଘାସ ଲଗାଇବାର 60ଦିନ ପରେ ଓ ପ୍ରତି କଟାର 45 ଦିନ ବ୍ୟବଧାନରେ କଟାଯାଏ । ସେହିପରି ମକା-45 ଦିନ ବ୍ୟବଧାନରେ କଟାଯାଏ । ସେହିପରି ମକା -45 ରୁ 50 ଦିନ , ଏମପି ଚେର ବା ଜୁଆର -70 ରୁ 80 ଦିନ , ବାଜରା -60 ରୁ 65 ଦିନରେ ଅମଳ ମିଳିଥାଏ । ମକା, ବାଜରା ଇତ୍ୟାଦି ଫୁଲ ଉଡାଇବା ପୂର୍ବରୁ ଗୋରୁଙ୍କୁ କାଟି ଖାଇବାକୁ ଦେବା ଆବଶ୍ୟକ । ଷ୍ଟାଇଲୋ ଫସଲ ଅଢେଇ ମାସରେ ପ୍ରଥମ କଟା ଅମଳ ହୁଏ ଏବଂ ପ୍ରତି 60 ଦିନ ଅନ୍ତରରେ ତାର ପରବର୍ତ୍ତୀ ଅମଳ ମିଳିଥାଏ । କଅଁଳିଆ ଅବସ୍ଥାରେ ହାତିଆ ଘାସ ଗୋରୁଙ୍କୁ ଖାଇବାକୁ ଦେବା ଅନୁଚିତ ।
ଅମଳ ପରିମାଣ - ପ୍ରତି ଏକର ପିଛା ହତିଆ ଘାସ
400 ରୁ 500 କୁଇଣ୍ଟାଲ, ଗିନି ଘାସ -250 ରୁ 300 କୁଇଣ୍ଟାଲ, ପାରାଘାସ -400 ରୁ 500 କୁଇଣ୍ଟାଲ, ମିଳୁଥିବା ବେଳେ ମକା 100 ରୁ 120 କୁଇଣ୍ଟାଲ, ବରଗୁଡି -60 ରୁ 70 କୁଇଣ୍ଟାଲ, ଗୁଆଁର -70 ରୁ 80 କୁଇଣ୍ଟାଲ, ଘାସ ବର୍ଷକୁ ମିଳିଥାଏ ।
ଅନ୍ତଃ ଚାଷ
ମକା+ବରଗୁଡି +ଡଙ୍ଗରରାଣୀ ଟିଓସେଣ୍ଟ + ବାଜରା + ବରଗୁଡି / ଦିନନାଥ + ବରଗୁଡି /ଗୁଆଁର ଆଦି ମିଶ୍ରିତ ଫସଲ ଚାଷ କଲେ ସନ୍ତୁଳିତ ସବୁଜ ଗୋଖାଦ୍ୟ ଭାବେ ଆମେ ଗୋରୁଙ୍କୁ ଖାଇବାକୁ ଦେଇପାରିବା । ଗୋରୁଙ୍କୁ ଏହି ମିଶ୍ରିତ ସବୁଜ ଗୋଖାଦ୍ୟ ଦେବା ଦ୍ଵାରା ସେମାନଙ୍କ ସ୍ୱାସ୍ଥ୍ୟବସ୍ଥା ଭଲ ରହେ ।
ଆମର ଏଠାରେ ଭଲ ଭାବେ ବଢିପାରୁଥିବା କେତେକ ଉପଯୋଗୀ ବୃକ୍ଷ ବା ଗଛଗୁଡିକ ହେଲା – ସୁବାବୁଲ , ଶିଶୁ , ଅଗସ୍ତି , ଅର୍ଜୁନ ଇତ୍ୟାଦି । ସୁବାବୁଲ ବା କେଳି କଦମ୍ବ ପ୍ରାଣୀଙ୍କ ଖଦ୍ୟୋପଯୋଗୀ ବୃକ୍ଷ ,ଯାହାର ଫଳ ମଞ୍ଜି ପତ୍ର ଡାଳ, ଛେଳି , ମେଣ୍ଢା ଗାଈ ଓ ମଇଁଷିମାନଙ୍କୁ ଖାଇବାକୁ ଦିଆଯାଇପାରିବ ।
ଏହି ପତ୍ରରେ 20 ପ୍ରତିଶତ ପୃଷ୍ଟିସାର ନିହିତ ଥାଏ । ବାବୁଲ ହେଉଛି ଏକ ମରୁଡି ସହନଶୀଳ ଗଛ । ଏହା ଉଭୟ ଅମ୍ଳ ଓ କ୍ଷାରିୟ ମାଟିରେ ଭଲ ବଢିପାରେ । ଏହାର ପତ୍ର ଓ ଫଳକୁ ଛେଳି ମେଣ୍ଢା ଙ୍କ ଖାଦ୍ୟ ରୂପେ ବ୍ୟବହାର ହୋଇପାରିବ । ସେହିପରି ଶିରିଶ ଗଛ ସମସ୍ତ ପ୍ରକାର ଜଳବାୟୁ ଓ ମୃତ୍ତିକା ରେ ଭଲ ବଢିପାରେ । ଏହାର ପତ୍ର ଓ କଅଁଳିଆ ଡାଳ ଅତ୍ୟନ୍ତ ସୁସ୍ଵାଦୁ ଏବଂ ଏହାକୁ ଗୋରୁ , ଛେଳିମେଣ୍ଢାଖାଇବାକୁ ଭଲପାଆନ୍ତି । ଏହି ଗଛର ଛାଇରେ ଗିନି ଘାସ ମଧ୍ୟ ଚାଷ କରାଯାଇପରେ । ଅଗସ୍ତି ହେଉଛି ଏକ ମରୁଡି ସହନଶୀଳ ଗଛ ଏବଂ ଏହା ଖୁବଶୀଘ୍ର ବଢେ । ଏହି ଗଛ ବାୟୁମଣ୍ଡଳରୁ ଯବକ୍ଷାରଜାନ ଗ୍ରହଣ କରିବା ସହିତ ମୃତ୍ତିକାର ଦକ୍ଷତା ବୃଦ୍ଧି ବୃଦ୍ଧି କରେ । ଏହାର ପତ୍ର ଓ ଫଳକୁ ସବୁଜ ଗୋଖାଦ୍ୟ ରୂପେ ବ୍ୟବହାର କରାଯାଇପାରିବ । ଅର୍ଜୁନ ଗଛ ଆମ ରାଜ୍ୟର ନଦୀ ଓ ଝରଣା କୁଳଗୁଡିକରେ ଦେଖିବାକୁ ମିଳେ । ଏହାର କଅଁଳିଆ ପତ୍ରକୁ ଛେଳି ଖାଇବାକୁ ଭଲ ପାଆନ୍ତି ।
ରାଜ୍ୟରେ ସବୁଜ ଗୋଖାଦ୍ୟରେ ଚାହିଦା ମେଣ୍ଟାଇବା ପାଇଁ ରାଜ୍ୟ ସରକାର ଚଳିତ ବର୍ଷ କେତେକ କାର୍ଯ୍ୟକ୍ରମ ଗ୍ରହଣ କରିଛନ୍ତି । ଆମ ରାଜ୍ୟର ମରୁଡି ପ୍ରପୀଡିତ 21 ଟି ଜିଲ୍ଲାରେ ଗୋପାଳନ ଦ୍ଵାରା ଅଧିକ ଲାଭବାନ ହେବା ପାଇଁ ଅତିରିକ୍ତ ତୃଣ ଉନ୍ନୟନ କାର୍ଯ୍ୟକ୍ରମ ମାଧ୍ୟମରେ ବ୍ୟାପକ ଘାସ ଚାଷ ନିମନ୍ତେ ବର୍ତ୍ତମାନ ବାଜରା ଓ ବରଗୁଡି ମଞ୍ଜି ପ୍ୟାକେଟ ପ୍ରତ୍ୟେକ ପ୍ରାଣୀ ଚିକିତ୍ସା କେନ୍ଦ୍ରକୁ ଯୋଗାଇ ଦିଆଯାଇଛି । ସେହିପରି ଜାତୀୟ ପ୍ରାଣୀଧନ ମିସନ ଅଧୀନରେ କେନ୍ଦ୍ର ସରକାରଙ୍କ ମାଡ୍ରାସ ଓ ହାଇଦ୍ରାବାଦ ଘାସ ମଞ୍ଜି ଉତ୍ପାଦନ ଫାର୍ମରୁ ପିଣ୍ଡବିହନ ଅଣାଯାଇ ଆମ ରାଜ୍ୟର ନବରଙ୍ଗପୁର ଜିଲ୍ଲା ଓ ଢେଙ୍କାନାଳ ଜିଲ୍ଲାରେ ମକା ବରଗୁଡି ଚାଷ ଚାଷୀଙ୍କ ଦ୍ଵାରା କରାଯାଇ ପ୍ରମାଣିତ ବିହନ ଉତ୍ପାଦନ କରାଯାଉଅଛି । ଏତତଦ୍ଵାରା, ରାଜ୍ୟ ସରକାର ଅଧୀନରେ ଥିବା ଘାସ ମଞ୍ଜି ଉତ୍ପାଦନ ଫାର୍ମରୁ 4320 ଟି ଘାସ ଅଛି । ବର୍ତ୍ତମାନ ଦୁଗ୍ଧ ଚାଷୀଙ୍କୁ ଯୋଗାଇଦିଆଯାଉଛି ଚାଷ ପାଇଁ ଘାସ ମୂଳ ବା କାଣ୍ଡ ଚାହୁଁଛନ୍ତି । ସେମାନେ ରାଜ୍ୟ ସରକାରଙ୍କ ନିମ୍ନଲିଖିତ 13 ଟି ସବୁଜ ଘାସ ପ୍ରଦର୍ଶନ ଫାର୍ମରୁ ପାଇପାରିବେ ଯଥା - ଲକ୍ଷ୍ମୀ ସାଗର (ଖୋର୍ଦ୍ଧା ) , ଗତିରାଉତ ପାଟଣା, ହଂସପଦା , ପୁରୀ ସଦର , ଶଗଡି , ବାରିମୂଲ ଇତ୍ୟାଦି ସ୍ଥାନରେ ମିଳିପାରିବ । ତେବେ ମଞ୍ଜି ପାଇବାକୁ ହେଲେ ନିକଟସ୍ଥ ପ୍ରାଣୀ ଚିକିତ୍ସା କେନ୍ଦ୍ର ସହ ଯୋଗାଯୋଗ କରନ୍ତୁ ।
ଆଧାର – ଉପନିର୍ଦ୍ଦେଶକ, ପ୍ରାଣୀରୋଗ ଗବେଷଣା ପ୍ରତିଷ୍ଠାନ , ଫୁଲନଖରା , କଟକ
Last Modified : 12/15/2019