ବଢାନ୍ତୁ ସମସ୍ୟା ସମାଧାନ, ଦୃଢ ନିଷ୍ପତ୍ତି ନେବାର ଦକ୍ଷତା

ଉପକ୍ରମ

ଛାତ୍ର ଜୀବନରେ ସମସ୍ୟା ସମାଧାନ କରିବା, କୌଣସି କାମ ପାଇଁ ଦୃଢ ନିଷ୍ପତ୍ତି ନେବା ହେଉଛି ଏକ ବଡ ଦକ୍ଷତା । ଏହି ଦୁଇଟି ଗୁଣ କେବଳ ଛାତ୍ର ଜୀବନ ନୁହେଁ ସାରା ଜୀବନ କାମରେ ଲାଗିଥାଏ ।

ସମସ୍ୟା ସମାଧାନ ଓ ନିଷ୍ପତ୍ତି ଗ୍ରହଣ

ଏ ଦୁଇଟି ପରସ୍ପର ପରିପୂରକ । ସମସ୍ୟାର ସମାଧାନ ସହଜ ଉପାୟ ନିଷ୍ପତ୍ତି ନେବା ଉପରେ  ନିର୍ଭର କରେ । ଆଉ ନିଷ୍ପତ୍ତି ନେବା ଗୁଣ ପରିଚାଳନା ଓ ନେତୃତ୍ଵ ନେବା ଦକ୍ଷତା ଉପରେ ସଂପୂର୍ଣ୍ଣ ନିର୍ଭର କରିଥାଏ ।  ଭାବପ୍ରବଣତା ଏହାର ବଡ ଶତ୍ରୁ । ଛାତ୍ର ଯଦି  ହୋମ୍ ସିକ୍ (ଘର- ପରିବାର ଆସକ୍ତ) ସେ କେବେ ବି ଏହି  ଦୁଇଟିଗୁଣର ଅଧିକାରୀ ହୋଇପାରିବେ ନାହିଁ ।  ହୋମସିକ୍ ଗୁଣ ଭାବପ୍ରବଣତାକୁ ଡାକି ଆଣେ । ଛାତ୍ରଛାତ୍ରୀଙ୍କ ପାଇଁ ଏସବୁ ଦୁର୍ବଳତା ମୁଣ୍ଡ ବିନ୍ଧାର କାରଣ ହୋଇଥାଏ । ଜୀବନରେ କିଛି କରିବାକୁ ହେଲେ,ବଡ଼ ହୋଇ କୌଣସି ସାମାଜିକ ଦାୟିତ୍ଵ ନିର୍ବାହ କରିବାକୁ ଚାହୁଁଥିଲେ ଏସବୁ ଅବାଞ୍ଛିତ ଦୁର୍ବଳତାରୁ ନିଜକୁ ମୁକ୍ତ କରିବାକୁ ହେବ ।

ତତ୍କାଳ ସମସ୍ୟା ସମାଧାନ କରିବା ଏବଂ ନିଷ୍ପତ୍ତି ନେବାର ଦକ୍ଷତା ବୃଦ୍ଧି କରିବା ପାଇଁ ଅନେକ ପ୍ରକାର  କୌଶଳ ଅଛି । ତେବେ ଅନେକ ଛାତ୍ରଛାତ୍ରୀଙ୍କ ମଧ୍ୟରେ ଏହି ନିଷ୍ପତ୍ତି ନେବାର ଦକ୍ଷତା ପିଲାବେଳୁ ରହିଥାଏ । ଏହିଭଳି ପିଲା ବଡ ହେବା ପରେ ନିଷ୍ପତ୍ତି ନେବା କ୍ଷେତ୍ରରେ ଆପେ ଆପେ ଦକ୍ଷ ହୋଇଯାଇଥାନ୍ତି । ଅନେକ ଛାତ୍ରଛାତ୍ରୀ ଭଲ ନିଷ୍ପତ୍ତି ନେଇ ପାରନ୍ତି ନାହିଁ ମାତ୍ର ସେମାନଙ୍କର ମୂଲ୍ୟାଙ୍କନ (ଆକଳନ) କରିବା ଦକ୍ଷତା ବହୁତ ଭଲଥାଏ । ଏଭଳି ଛାତ୍ରଛାତ୍ରୀ ଚାହିଁଲେ ଭଲ ନିଷ୍ପତ୍ତି ନେଇପାରିବେ । ସ୍ପଷ୍ଟ କରି କହିଲେ ଯଦି ଜଣଙ୍କ ମଧ୍ୟରେ ଆକଳନ ନିଷ୍ପତ୍ତି ନେଇ ସଫଳ ହେଲେ ତା’ପରେ ଅଭିଜ୍ଞତା ଆଧାରରେ ସଠିକ୍ ନିଷ୍ପତ୍ତି ନେବା ଦକ୍ଷତାର ବିକାଶ ହୋଇଥାଏ । ସମସ୍ୟା ସମାଧାନ କରିବା, ନିଷ୍ପତ୍ତି ନେବା – ଏ ଗୁଣ ଦୁଇଟି ପ୍ରତିଭା ବା ମେଧାକୁ ଅପେକ୍ଷା ରଖେ। ଜଣେ ସେତିକି ପ୍ରତିଭାବାନ ହୋଇ ନଥିଲେ ଏହି ଦୁଇଟି ଗୁଣରେ ଦକ୍ଷ ହୋଇପାରିବେ ନାହିଁ । କୌଣସି କିଛିକୁ ଚିହ୍ନଟ କରିବା ଏବଂ ତାକୁ ତା’ ଭଳି ବିକଶିତ କରିବା ସହଜ କଥା ନୁହେଁ । ସାଧାରଣ ଛାତ୍ରଛାତ୍ରୀଙ୍କ ମଗଜର ଏ କଥା ସହଜରେ ପଶେ ନାହିଁ । ଏଥିପାଇଁ ମାନସିକସ୍ତରରେ ଖୁବ୍ ଏକ୍ସରସାଇଜ୍ କରିବାକୁ ପଡିବ ।

ସଫଳ ରୂପାୟନ

କୌଣସି କ୍ଷେତ୍ରରେ ଭଲ ନିଷ୍ପତ୍ତିଟିଏ ନେବା ଆଉ ତା’ର ସଫଳ ରୂପାୟନ କରିବା – ଏହା ଦରକାର କରେ ମେଧାର ବିକାଶ, ସୁଯୋଗର ଚିହ୍ନଟକରଣ, ବିଚାରଶୀଳତାର ସ୍ପଷ୍ଟତା, ନିଷ୍ପତ୍ତିର ଦୃଢତା ଏବଂ ଶେଷରେ ଏହାକୁ କାର୍ଯ୍ୟକାରୀ କରିବାର ଦକ୍ଷତା । ଏହିସବୁ ଗୁଣ ମେଧା ନଥିଲେ କେହି କେବେ ବି ହାସଲ କରିପାରିବେ ନାହିଁ । ଏହି କ୍ଷେତ୍ରରେ ଆପଣଙ୍କୁ ଅନ୍ୟ କେହି ଯେତେ ପ୍ରତିଭାଧାରୀ ବ୍ୟକ୍ତି ହୁଅନ୍ତୁ ନା କାହିଁକି ସାହାଯ୍ୟ କରିପାରିବେ ନାହିଁ । ଏହାର କାରଣ ହେଉଛି ଜଣେ ଯେତେବେଳେ କୌଣସି ସମସ୍ୟାର  ସମାଧାନ କରିବାକୁ ଚେଷ୍ଟା କରନ୍ତି, କୌଣସି କିଛି କାର୍ଯ୍ୟ କରିବା ପାଇଁ ନିଷ୍ପତ୍ତି ନେବାକୁ ବାହାରନ୍ତି ସେ କେବଳ ନିଜ ମନର ବିକାଶ ତଥା ଅଭିଜ୍ଞତା ପରିମାପ ଅନୁଯାୟୀ ଏ କଥା କରିଥାନ୍ତି।

ଏସବୁ କ୍ଷେତ୍ରରେ କାହାର ସାହାଯ୍ୟ ନେବାକୁ ଅପେକ୍ଷା କରିବା ଅର୍ଥ ସମସ୍ୟାକୁ ଜଟିଳ କରିବା ଏବଂ ନିଷ୍ପତ୍ତିକୁ ଅଧପନ୍ତରିଆ କରି ଛାଡିବା । ତେଣୁ ନିଜ ଭିତରେ ଏଥିପାଇଁ ଥିବା ଆନୁସାଙ୍ଗିକ ଗୁଣଗୁଡ଼ିକର ବିକାଶ କରିବାକୁ ହିଁ ହେବ । ତେବେ ଯାଇ ଜଣେ ଭବିଷ୍ୟତରେ ପାରିବାରିକ, ସାମାଜିକ କ୍ଷେତ୍ରରେ ସଫଳ ହୋଇପାରିବେ ।

ଆଧାର – ଦୈନିକ ପ୍ରମେୟ